Demokraatit Sermersooq Kitaani siulittaasup Anna Wangenheimip siunnersuutigaa, sukkanerpaamik Danmark attavigineqassasoq siunertaralugu Kalaallit Nunaata ajornannginnerusumik immikkut ilisimasalinnik sulisussarsisinnaalernissaa. Immikkut ilisimasallit ilinniarluarsimasullu massakkorpiaq amigaatigineqarluinnarput.

Anna Wangenheim nammineq afdelingssygeplejerskiuvoq SANA-milu sulilluni. Allanut naleqqiullugu nalunngilluinnarpaa skandinaviameersunik peqqissaasunik sulisussarsinissaq ajornarluinnangajattoq aamma nunani taakkunani peqqissaasut amigaataaqimmata.

”Annertuumik ajornartorsiutaavoq nunaqavissunik peqqissaasunik naammatunik peqannginnatta peqataanillu nunani avannarlerneersunik sulisussarsinissaq ajornaqimmat ajornartorsiuteqarpugut annertuumik. Ajalusuuliivippugut allaat napparsimasortagut katsorsarsinnaajunnaalerpagut. Taamaattumik maannamut naleqqiullugu iliuuseqarnerusariaqarpugut immikkut ilinniarsimasunik sulisussarsiniarnitsinni, soorlu peqqissaasunik” taama oqarpoq Anna Wangenheim erseqqissarlugulu peqqissaasunut tunngasuinnaat ilisimasaqarfigigini, malugisimanerarpaali immikkoortumi tassaniinnaq ajornartorsiortoqanngitsoq.

Erseqqissarpaa danskit nunasiniartunut malittarisassat sakkortuut pissutaallutik nunat avannarliit EU-llu avataaneersunik sulisussarsiniartarneq imaannaanngitsuusoq. Periarfissaqarporli taakkulu ullumimut naleqqiullugu atorluarnerusariaqarpagut.

”Isumaqarpunga Naalakkersuisut aamma ajornanngippat folketingimi ilaasortatta erngerlutik Danmark isumaqatiginiartariaqaraat paasiniarlugu kalaallit nunaanni sulliviit paaqqinnittarfiillu aaqqissuussinermut Fast-trackimut ilanngunneqarsinnaanersut. Aaqqissuussineq Fast-track atorlugu sukkanerusumik ajornannginnerusumillu suliffeqarfiit takornartanik immikkut ilisimasalinnik Danmarkimut tikisitsisinnaasarput. Pitsaassagaluaqaaq aamma nunami maani aaqqissuussineq tamanna atorsinnaagaluarutsigu” Anna Wangenheim oqarpoq.

Wangenheimip tikkuarpaa nunasiniartarnermut oqartussaaneq suli tigunikuunngikkipput taamaattumillu danskit naalagaaffia avaqqullugu immikkut iliuuseqarsinnaanerput killeqangaatsiartoq.

”Taamaattuminguna isumaqartunga piaarnerpaamik naalagaaffik isumaqatiginiartariaqaripput periarfissat assigiinngitsut misissorniarlugit. Aaqqissuussineq Fast-track pillugu siunnersuuteqarama kissaatigiinnarpara pineqartup isumaqatigiinniarnernut ilanngunneqarsinnaanissaa.  Aammali aaqqiissutaasinnaasut allat tikilluaqqunaqaat. Uannut pingaarnerpaavoq ajornartorsiutip sukkanerpaamik iliuuseqarfiginissaa qularnaarumallugu innuttaasut pitsaasumik kiffartuunneqarnissaat” Anna Wangenheim naggasiivoq.

Inussiarnersumik inuulluaqqusilluta
Anna Wangenheim
Demokraatit

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt