Ileqqoreqqusat.

Ileqqoreqqusat

Demokraatini ileqqoreqqusat

§ 1

Taaguut angerlarsimaffillu

Partii taaguuteqarpoq Demokraatit. (Danskisut Demokraterne)

Partii Nuummi, Kalaallit Nunaanni angerlarsimaffeqarpoq.

Siulersuisuunerit uani allaffeqarput: Namminersorlutik Oqartussat, Demokraatit, Postboks 1060, 3900 Nuuk

§ 2

Ileqqoreqqusat atorneqarnerat

Ileqqoreqqusat partiimi Demokraatini tamarmi atorneqartussaapput partiillu nunap immikkoortuini immikkoortortaqarfiinut Demokraatillu Inuusuttaannut aamma atuullutik.

§ 3

Siunertaq

Partii nammineq kajumissutsiminnik kattuffiuvoq, inuiaqatigiinni inuup sapinngisamik annertunerpaamik kiffaanngissuseqarnissaanik, pigisatigut isumannaatsuunissaanik kiisalu inuttut pisinnaatitaaffiit tamani atuuttut eqquutsinneqarnissaannik anguniagaqartoq.

Partiip anguniagaraa inuiaqatigiit atugarissaarfiusut qaammarsagaasullu pilersinnissaannut innuttaasut katersornissaat, inuiaqatigiillu aaqqissugaaneranni aalajangiinerit pingaarutillit tamarmik inuiaqatigiinni naqisimaneqanngitsumik isornartorsiuisumillu sukumiisumik oqallisigineqareerlutik, tusagassiuutit naqisimaneqanngitsut arlaannaanulluunniit attuumanngitsut ilanngullugit, nunami atugassarititaasut periarfissallu piviusut tunngavigalugit pisarnissaat.

Partii inuiaqatigiit tamarmiusut soqutigisaat naapertorlugit inuiaqatigiit pigisaannik atornerluisoqannginnissaa inuiaqatigiillu atorfeqarfiini pissutsinut naapertuilluanngitsunut akiuiniassaaq.

Partiip nunap nunarsuarmut siaruarfiusumi ataqatigiinnerata qulakkeernissaa tapersersorlugulu siuarsassavaa, nunap nunanut tamalaanut atassuteqarnerata nunanilu tamalaani pisussaaffimminik aalajangiusimasaqarnissaa kiisalu innuttaasut aningaasaqarnikkut, politikkikkut kulturikkullu soqutigisaasa nalinginnaasut siuarsarneqarnissaat tapersersorlugillu siuarsassavai.

Partiip nunami ilinniartoqarfiit, meeqqat atuarfiat ilanngullugu, pitsanngorsarnissaat sulissutigiuassavaa, inuiaqatigiinni ilinniarsimassutsip pitsanngoriartortuarnissaa siunertaralugu.

Suliffissanik pilersitsinissaq akileraarutitigullu isertitaqarnissaq siunertaralugit namminersorluni inuussutissarsiuteqarnermi siuariartornissamut ineriartornissamullu sapinngisamik pitsaanerpaanik atugassaqartitsinissaq partiip sulissutigissavaa.

Partiip anguniagaata sapinngisamik annertunerpaamik piviusunngortinneqarnissaa partiip anguniagaraa.

§ 4

Ilaasortaanermi pissutsit

Ilaasortaanissamut piumasaqaatit

Kinaluunniit Kalaallit Nunaanni najugaqartoq, 18-ileereersimasoq, Demokraatilli Inuusuttaannut tunngatillugu 15-ileereersimasoq, partiillu anguniagaanik ileqqoreqqusaanillu akuersisoq, partiimik sullissisoq, inatsisit malillugit aalajangiussanik akuersisoq partiimullu ilaasortaanermut akiliuteqartoq Demokraatini ilaasortanngorsinnaavoq.

Ilaasortaanermi partiip aaqqissugaanera malinneqassaaq, immikkoortortaqarfik inuit allattorsimaffianni allassimaffigisaq malillugu. Demokraatilli Inuusuttai nuna tamakkerlugu atuupput.

Inuit Kalaallit Nunaata avataani najugaqartut piumasaqaatit assingi naapertorlugit ilaasortaasinnaapput, partiilli immikkoortortaqarfianut aalajangersimasumut ilaanatik. Taamatut ilaasortaasut qinigassanngortissinnaanngillat partiillu immikkoortuini piginnaaniligaasuni taasisinnaatitaanatik. Immikkoortortaqarfiit avataanni partiip qitiusumik allaffeqarfiata ataani eqimattatut immikkoortutut inissisimapput. Kalaallit Nunaannut nuunnermi taamatut ilaasortaaneq pineqartup qinnuteqarneratigut inuit allattorsimaffianni allassimaffigisaani immikkoortortaqarfimmut nuunneqassaaq.

Inuit partiimut ilaasortaasut ilinniagaqarnermut atatillugu nunanut allanut nuuttut, kissaatigineqarpat, nunap immikkoortuani immikkoortortaqarfimmut imaluunniit Demokraatit Inuusuttaannut ilaasortaanertik pigiinnarsinnaavaat.

Siornatigut ilaasortaasimasoq, ilaasortaajunnaarsinneqarsimasuunngitsorli, Siulersuisuunerit akuersissuteqarnerisigut immikkoortortaqarfiullu pineqartup siornatigut ilaasortaaffigisimasaata oqaaseqateqarneratigut aatsaat ilaasortanngoqqissinnaavoq. Siornatigut ilaasortaasimasup partiimut siornatigut akiitsorisimasaminik akiliisimanissaa partiimut ilaasortanngoqqinnissamut piumasaqaatigineqarpoq.

Ilaasortat partiip qullersaanit, Nuna Tamakkerlugu Ataatsimeersuarnermit, siornatigut ilaasortaajunnaarsinneqarsimasut aatsaat ilaasortanngorteqqinneqarsinnaapput Nuna Tamakkerlugu Ataatsimeersuarnermi najuuttut 2/3-iisa taasinikkut tamanna akuerippassuk.

Partiini allani siulersortitut inissisimasut Siulersuisuunerit akuersissuteqarnerisigut aatsaat ilaasortanngortinneqarsinnaapput.

Siulersuisuunerit ilaasortanngortitsinerup itigartitsissutigineqarnissaanik aalajangiisinnaapput.

Ilaasortanngorneq partiip nittartagaatigut www.demokraatit.gl-ikkut pissaaq. Nunap immikkoortuani immikkoortortaqarfimmi imaluunniit Demokraatit Inuusuttaanni taamaallaat ilaasortaasoqarsinnaavoq.

Ilaasortat pisussaaffigisaat pisinnaatitaaffiilu

Ilaasortap kialluunniit pisussaaffigaa:

a) partiip ileqqoreqqusai malissallugit, partiip siunertai anguniagaalu ataqqissallugit,

b) piginnaasani periarfissaqarninilu naapertorlugit partiip politikkiata ilusilersorneqarnera ingerlanneqarneralu peqataaffigissallugu, kiisalu

c) inatsisit naapertorlugit partiimi aalajangiinerit ataqqissallugit.

Ilaasortap kialluunniit pisinnaatitaaffigaa:

a) partiimut ilaasortaanullu tunngatillugu partiimi oqartussat arlaannulluunniit saaffiginnissinnaalluni,

b) immikkoortortaqarfimmi ataatsimiinnerni Nunalu Tamakkerlugu Ataatsimeersuarnermi ataatsimeersuarnernilu allani aallartitatut peqataanermini qinersinernut aalajangiinernullu allanut peqataanissaq partiillu suliaata tamarmiusup sunniuteqaqataaffiginissaa, kiisalu

c) Imminut tunngasunik aalajangiisoqassatillugu tamatigut isummaminik saqqummiussisinnaatitaaneq.

Ilaasortaajunnaarneq ilaasortaajunnaarsitsinerlu

Partiimit ilaasortaajunnaarneq partiip pisortatigoortumik e-mailianut nalunaaruteqarnikkut pissaaq, (demokraatit@demokraatit.gl). Ilaasortalli akiitsuni tamaasa akilissavai, ukiumi naatsorsuuseriffiusumi ilaasortaajunnaarfigisamini ilaasortaanermut akiliut ilanngullugu.

Ilaasortaq ilaasortaajunnaarsinneqarsinnaavoq makku pisimappata:

1) partiip ileqqoreqqusai imaluunniit inatsisit malillugit partiimi aalajangiinerit unioqqutillugit iliuuseqarsimappat, imaluunniit allatigut pissusilersornermigut partiip ataasiussusianik sanngiillisitsippat imaluunniit partiip isigineqarneranut akornutaasumik iliorpat,

2) suliassatut pisussaaffigisaminik ingerlatsinermi ingasattumik paarsinerluppat, imaluunniit

3) partiip illuatungerisaanik ikiuippat allatulluunniit partiimik politikkianillu pimoorussamik akerlilersuippat

Ilaasortaajunnaarsitsinermik aalajangiineq, ilaasortap pineqartup immikkoortortaqarfiata imaluunniit ulluinnarni aqutsisut tunngavilersukkamik inassuteqaateqarnerisigut Siulersuunernit akuersissutigineqassaaq. Ulluinnarni aqutsisut inassuteqaateqartillugit Siulersuisuunerit pisussaapput ilaasortaajunnaarsinneqarnissamik inassutigineqartup immikkoortortaqarfia taassumalu Nunap immikkoortuani immikkoortortaqarfia tusarniaavigissallugit.

Siulersuisuunerit pisussaaffigaat naammagittaalliuutip misissuiffiginissaa naammagittaalliuutigineqartullu naammagittaalliuutip imarisaanik tamatumunngalu tunngavilersuutigineqartoq pillugu ilisimatissallugu. Naammagittaalliuutigineqartoq naammagittaalliuummut allakkatigut imaluunniit oqaatsit atorlugit oqaaseqarsinnaatitaassaaq, naammagittaalliutigineqartulli Siulersuisuunernut oqaatsit atorlugit oqaaseqaateqarnissaminut periarfissinneqassanersoq Siulersuisuunerit aalajangigassaraat.

Ilaasortaajunnaarsitsinissamik aalajangiineq ilaasortamit Nuna Tamakkerlugu Ataatsimeersuarnermut tullermut suliareqqitassanngortinneqarsinnaavoq, taasinerillu atuuttut ikinnerpaamik 2/3-iuppata ilaasortaajunnaarsitsineq atuuttussanngortinneqassaaq. Siulersuisuunerni ilaasortanik ilaasortaajunnaarsitsineq Nuna Tamakkerlugu Ataatsimeersuarnermi taamaallaat aalajangiiffigineqarsinnaavoq.

Nuna Tamakkerlugu Ataatsimeersuarnermut suliareqqitassanngortitsinissamut piffissaliussaq tassaavoq ilaasortap ilaasortaajunnaarsinneqarnerminik nalunaaruteqarfigineranit ullut 30-t qaangiutsinnagit. Suliareqqitassanngortitsineq partiip qitiusumik allaffeqarfianut tunniunneqassaaq.

Suliareqqitassanngortitsinerup suliarineqarnerani ilaasortamik mattussigallarnissamik Siulersuisuunerit aalajangiisinnaapput. Ilaasortaq mattussaagallartoq partiimut sinniisuusinnaanngilaq.

§ 5

Siulersuisuunerit

Siulersuisuunerit nuna tamakkerlugu ataatsimeersuarnerit akornanni partiimi oqartussat qullersaraat arfineq-marlunnik ilaasortaqartut.

Siulersuisuunerit partiimut sinniisuupput, partiip politikkikkut aaqqissuussaanikkullu ingerlatsineranik aqutsisuullutik, kiisalu partiip allaffiani atorfilinnik soorlu partiip allattaanik, kampagnelederinik, siunnersortinik allanillu atorfinitsitsillutillu nakkutilliisuupput.

Suliat suulluunniit Siulersuisuunernut saqqummiunneqartut siulersuisuunernit aalajangiiffigineqassapput. Siulersuisuunerit Nuna Tamakkerlugu Ataatsimeersuarnerit akornanni suliareqqitassanngortitsisarfiit qullersaraat.

Siulersuisuunerit allatseqarlutik inissitsitissapput. Siulittaasoq, politikkikkut siulittaasup tullia, aningaaserisoq Nuna Tamakkerlugu Ataatsimeersuarnermi toqqaannartumik qinerneqartarput. Siulersuisuunerit ulluinnarni aqutsisut siulittaasumit siulersorneqartut akunnerminni toqqassavaat, taakkulu politikkikkut aaqqissuussaanikkullu ingerlaavartumik sulineq akisussaaffigissavaat siulersuisuunerillu ataatsimiinnerisa akornanni partiip qitiusumik aqunneqarnera isumagalugu. Ilaasortat amerlassusissaat Siulersuisuunerit aalajangissavaat.

Siulersuisuunernut sinniisussat siulersuisuunerit ataatsimiinnerini peqataassapput, taasisinnaatitaanatilli. Aammattaaq nunap immikkoortuini immikkoortortaqarfiit Demokraatillu Inuusuttai siulersuisuunerit ataatsimiinnerinut peqataasinnaatitaapput, oqaaseqarsinnaatitaallutik taasisinnaatitaanatilli. Siulittaasorli Siulersuisuunernilu ilaasortaq alla qaqugukkulluunniit aalajangersinnaavoq immikkoortut ilaat mattoqqasumik suliarineqassasoq, tamatumanilu Siulersuisuunerni ilaasortat Nuna Tamakkerlugu Ataatsimeersuarnermi qinerneqartut kisimik najuutissapput.

Siulersuisuunerni sulineq ataatsimiinnerni pisarpoq. Siulersuisuunerit qanoq ingerlatseriaaseqarnissartik namminneq aalajangissavaat, siulersuisuunerilli ataatsimiinnerini aalajangikkat imaqarniliornissaat qulakkeerneqassaaq, taakkulu ataatsimiinnermi tullermi akuersissutigineqassapput.

Ataatsimiinnerit siulittaasup aalajangiineratigut ingerlanneqartassapput, imaluunniit siulersuisuunerni ilaasortanit pingasunit tamanna piumasarineqarpat. Ataatsimiigiaqqusineq allakkatigut pissaaq ullormullu oqaluuserisassat ilanngullugit oqaatigineqassallutik.

Siulersuisuunerit aalajangiisinnaassuseqarput ikinnerpaamik siulersuisunut ilaasortat sisamat ataatsimiinnermi najuuppata. Taasinerit amerlaqatigiissillugit siulittaasup taartaataluunniit taasinera aalajangiisuusassaaq.

Ulluinnarni aqutsisut Siulersuisuunernut akisussaapput siulersuisuunerillu ataatsimiinnerini nalunaaruteqartussaallutik.

Siulersuisuunerit aalajangissavaat kikkut partii sinnerlugu nuna tamakkerlugu qinersinernut soorlu Inatsisartunut Folketingimullu aammalu kommunini najukkani qinersinernut, Nunap immikkoortuini immikkoortortaqarfeqanngitsuni qinigassanngortinneqassanersut.

Siulersuisuunerit 2/3-nik amerlanerussuteqarfiusumik partiip politikkikkut anguniagaanik allannguinissamik piffissami qanoq ilinikkulluunniit aalajangiisinnaapput. Partiip anguniagaanut allannguutit kingorna Nuna Tamakkerlugu Ataatsimeersuarnermi siullermi akuersissutigineqassapput.

Partiip Nunap immikkoortuini immikkoortortaqarfinnut kiisalu Demokraatit Inuusuttaannut tapiissutaasinnaasut Siulersuisuunerit aalajangiiffigissavaat tapiissutillu akilerneqarnissaat isumagalugu.

Siulersuisuunerit pisariaqassappat akissarsiaqartitsillutik sulititsisinnaapput.

§ 6

Nuna tamakkerlugu Ataatsimeersuarneq

Nuna Tamakkerlugu Ataatsimeersuarnissamut aggersaaneq

Nuna Tamakkerlugu Ataatsimeersuarneq partiimi oqartussatut qullersaavoq. Ileqquusumik Nuna Tamakkerlugu Ataatsimeersuarneq ukioq allortarlugu ukiup kisitsisaata avinneqarsinnaasup affaani siullermi pisarpoq (siullermik 2018-imi).

Nuna Tamakkerlugu Ataatsimeersuarnissamut aggersaaneq kiisalu ullormut oqaluuserisassat ataatsimiinnissaq qaammaammik ataatsimik kingusinnerunngitsumik sioqqullugu (ullut 30-t) ilisimatitsissutigineqassapput.

Siulersuisuunerit Immikkut ittumik Nuna Tamakkerlugu Ataatsimeersuartitsinissamut aggersaasinnaapput, siulersuisuunerni ilaasortat ikinnerpaamik 2/3-lii, imaluunniit partiip nunap immikkoortuini immikkoortortaqarfii Demokraatillu Inuusuttai ikinnerpaamik sisamat tunngavilersukkamik ullormut oqaluuserisassaqartitsillutik tamanna piumasarippassuk.

Nunap immikkoortuini immikkoortortaqarfiit aamma ilaasortaq ilaasortalluunniit ilaasortaanermut akiliuteqartut Nuna Tamakkerlugu Ataatsimeersuarnermut siunnersuuteqarsinnaapput, siunnersuutillu Nuna Tamakkerlugu Ataatsimeersuarnissaq kingusinnerpaamik ullunik 14-inik sioqqullugu Siulersuisuunerit tigoreersimassavaat.

Immikkut ittumik Nuna Tamakkerlugu Ataatsimeersuarnissamut aggersaasoqartillugu piffissaliussat taaneqartut Siulersuisuunerit sivikillisinnaavaat.

Qinigassanngortissinnaatitaasut taaseqataasinnaasullu

Ilaasortat ilaasortaanermut akiliuteqartut kikkulluunniit partiimi inissanut qinigassanngortissinnaapput.

Nuna Tamakkerlugu Ataatsimeersuarnermi taaseqataasinnaasut tassaapput Nunap immikkoortuini immikkoortortaqarfinnit tamanit ikinnerpaamik aallartitaq 18-ileereersimasoq ataaseq, Demokraatit Inuusuttai ilanngullugit. Aallartitap ataaseq sinnerlugu taasisinnaanera periarfissaavoq.

Immikkoortortaqarfik Nuna Tamakkerlugu Ataatsimeersuarnermut ikinnerpaamik ilaasortanut tamakkiisumik ilaasortaasunut ilaasortaanermullu akiliuteqartunut tallimanut aallartitamik taaseqataasinnaasumik ataatsimik toqqaasinnaatitaapput. Taasinerit amerlassusaat kisinneqartassapput tallimaniit aallartillugit, imak paasineqassaaq tallimanik ilaasortaqaraanni taasineq ataasiussaaq, arfinillit qulillu akornanni ilaasortaqaraanni taasinerit marluussaapput, aqqanillit aqqaneq tallimallu akornanni ilaasortaqaraanni taasinerit pingasuussapput. Immikkoortortaqarfimmi ilaasortat tamakkiisumik ilaasortaasut ilaasortaanermullu akiliuteqartut amerlassusaat Nuna Tamakkerlugu Ataatsimeersuarnissamut aggersaanerup ullulerneqarfia naapertorlugu naatsorsorneqassapput. Tamatuma saniatigut Siulersuisuunerni ilaasortat tamarmik immikkut ataatsimik taasisinnaatitaapput.

Angalanermut aningaasartuutit

Nuna Tamakkerlugu Ataatsimeersuarnermut angalanermi najugaqarnermilu aningaasartuutaasut immikkoortortaqarfimmit aallartitaasoq/-sut sinnerlugit aallartitaasukkut akilerneqassapput. Siulersuisuunerit aalajangersinnaapput aningaasartuutit tamakkerlugit ilaannaalluunniit partiimit akilerneqassasut.

Nuna Tamakkerlugu Ataatsimeersuarnerup ingerlanneqarnera

Nuna Tamakkerlugu Ataatsimeersuarnermi isumaqatigiinniarnerit ingerlanneqassapput aqutsisoq pisortaralugu, taannalu ataatsimeeqataasunit toqqarneqassaaq. Aqutsisuusoq siulersuisuunerni ilaasortaassanngilaq.

Aallartitat ilaasortallu oqarasuaatikkut videokonferencekkut/televideokkut peqataasinnaapput.

Ileqquusumik Nuna Tamakkerlugu Ataatsimeersuarnermi ullormut oqaluuserisassat imarisassaat:

1. Aqutsisussamik toqqaaneq

2. Imaqarniliortussamik toqqaaneq

3. Ullormut oqaluuserisassat akuerineqarnerat

4. Siulittaasup nalunaarutaa

5. Partiip anguniagaata akuerineqarnerat.

6. Ukiut siuliinut marlunnut naatsorsuutit akuersissutigineqarnerat

7. Ukiunut tullernut marlunnut missingersuutit akuersissutigineqarnerat

8. Ilaasortaanermut akiliutip aalajangersarnera

9. Siunnersuutit tiguneqartut

10. Siulersuisuunerni siulittaasumik qinersineq

11. Politikkikkut siulittaasup tullianik qinersineq

12. Aaqqissuussaanikkut siulittaasup tullianik qinersineq

13. Aningaaserisumik toqqaaneq

14. Siulersuisuunerni ilaasortanik pingasunik sinniisussanillu arfineq-marluk tikillugit qinersineq

15. Kukkunersiuisumik toqqaaneq

16. Tamalaat.

Nuna Tamakkerlugu Ataatsimeersuarnermi aalajangiinerit amerlanerussuteqarnikkut aalajangerneqartassapput, tamanna ileqqoreqqusani matumani allatut allassimasoqanngippat. Taaseqataasinnaatitaasoq ataasiinnarluunniit kissaateqarpat taasinerit allakkatigut ingerlanneqassapput.

Taasineq qarasaasiakkut pisinnaavoq, SMS-ikkut, Messengerikkut, e-mailikkut assingusutigulluunniit taasinerit ilanngullugit. Qarasaasiakkut taasinerit aqutsisumut ingerlanneqartassapput. Pisinnaatitsissutikkut taasisoqarsinnaavoq.

§ 7

Nunap immikkoortuini immikkoortortaqarfiit aamma Demokraatit Inuusuttai

Nunap immikkoortuini immikkoortortaqarfiit kommunit killeqarfii qaqugukkulluunniit atuuttut malissavaat, Nunap immikkoortuanilu immikkoortortaqarfiup taagutaa tassaajuaannassaaq Demokraatit periarlugu immikkoortortaqarfimmi najukkap taaguutaa.

Tamatumunnga ilaanngillat Kommuneqarfik Sermersuumi Nunap immikkoortuani immikkoortortaqarfiit immikkoortortaqarfinnut marlunnut avinneqarsimasut: Demokraatit Sermersooq Kitaani (Nuup Paamiullu nunaqarfiillu taakkununnga atasut) aamma Demokraatit Tunu (Tasiilaq Ittoqqortoormiillu nunaqarfiillu taakkununnga atasut).

Demokraatit Inuusuttai nuna tamakkerlugu atuupput.

Nunap immikkoortuini immikkoortortaqarfiit kiisalu Demokraatit Inuusuttai akuerisaassagunik Nunalu Tamakkerlugu Ataatsimeersuarnermi taaseqataasinnaatitaassagunik ilaasortaanermut akiliuteqartunik tamatigut ikinnerpaamik tallimanik ilaasortaqassapput siulersuisunilu pingasunik ilaasortaqassallutik.

Nunap immikkoortuani immikkoortortaqarfimmut Demokraatillu Inuusuttaannut ileqqoreqqusat Siulersuisuunernit akuersissutigineqassapput immikkoortortaqarfiillu pineqartut partiip anguniagai akuerissavaat. Matumani ileqqoreqqusat nunap immikkoortuani immikkoortortaqarfimmi ileqqoreqqusanut Demokraatillu Inuusuttaannut ileqqoreqqusanut naleqqiullugit salliutinneqarnerat immikkoortortaqarfiit akuerissavaat.

Nunap immikkoortuini immikkoortortaqarfiit Demokraatillu Inuusuttaasa immikkoortortaqarfiup aningaasaqarneranut akisussaasuupput isertitanillu aningaasartuutinillu naatsorsuutinut allattuissallutik. Nunap immikkoortuini immikkoortortaqarfiit Demokraatillu Inuusuttai Nuna tamakkerlugu kattuffiup naatsorsuutinik saqqummiussineranut ilaatinneqarput immikkoortumillu naatsorsuutinik ingerlatsisuunatik.

Immikkoortortaqarfimmi siulersuisut aalajangiisinnaassuseqanngikkaangata Siulersuisuunerit

aalajangersinnaavaat nunap immikkoortuani immikkoortortaqarfimmi aamma/imaluunniit Demokraatit Inuusuttaanni ataatsimeersuartoqassasoq.

Nunap immikkoortuani immikkoortortaqarfimmi siulersuisut aalajangissavaat kikkut partii sinnerlugu kommunimut nunaqarfimmiluunniit aqutsisunut sassartinneqassanersut. Immikkoortortaqarfiup taamaallaat partii sinnerlugu sassartinneqartussanik toqqaasinnaavoq immikkoortortaqarfimmi imaluunniit Demokraatit Inuusuttaanni ilaasortaappat kommunimilu pineqartumi najugaqartuuppat.

Demokraatit Inuusuttai kommunimut nunaqarfimmiluunniit aqutsisunut sassartikkusutaminnik nunap immikkoortuani immikkoortortaqarfimmut innersuussisinnaapput.

Kommuneqarfik Sermersuumi, marlunnik immikkoortortaqarfiusumi kommunimut qinersisoqartillugu, immikkoortortaqarfiit marluusut suleqatigiillutik ataatsimoorussamik aqutsisoqatigiinnik immikkoortortaqarfiit siulersuisuini ilaasortanik peqataaffigineqartumik pilersitsissapput, isumaqatigiillutillu attuumassuteqannginnissamullu maleruagassat nalinginnaasut malillugit qinersinermut sassartitassanik toqqaassapput, kiisalu sassartinneqartut qinersisartunik ataatsimiititsinerni peqataassanersut aalajangiiffigalugu. Immikkoortortaqarfiit akornanni isumaqatigiinngissutsit Siulersuisuunerni aalajangiiffigineqassapput.

Nunap immikkoortuini immikkoortortaqarfiit Demokraatillu Inuusuttaasa tamatuma saniatigut suliassaraat:

a) innuttaasut aningaasarsiornikkut, politikkikkut kulturikkullu soqutigisaannik siuarsaanissaq sulissutigissallugu,

b) Innuttaasut akornanni partiip politikkianut aalajangiussaanullu tunngatillugu politikkikkut, aaqqissuussaanikkut isumaqatissarsiornikkullu suliaqarnissaq,

c) partiimut nutaanik ilaasortassarsiornissaq, kiisalu

d) ilaasortat partiip anguniagaanut politikkianullu teoriimut sulinermullu tunngatillugu ilisimasaqarnissaat isumagissallugu.

§ 8

Naatsorsuutit pigisallu nalillit

Partiip naatsorsuutaasa ilaasortallu ukiumut akiliutaasa qaammatisiutit malillugit nikittarneq malippaat.

Partiip ukiumoortumik naatsorsuutai kukkunersiuisumit nuna tamakkerlugu ataatsimeersuarnermi toqqarneqartumit ukiumoortumik kukkunersiorneqartarput ukiup tulliani kingusinnerpaamik 30/6 piareersimasussanngorlugit. Ukiunili kisitsisaa avinneqarsinnaasuni (ukiut nuna tamakkerlugu ataatsimeersuarfiusut) naatsorsuutit Nuna Tamakkerlugu Ataatsimeersuarnerup ingerlanneqarnissaanut naammassineqareersimassapput.

Partiip aningaasaatai ilaasortaanermut akiliutinit, inatsisitigut aalajangersarneqartumik partiinut tapiissutinit inuinnarniillu, kattuffinnit allanillu tunissutinit pissarsiarineqartarput aningaaserivimmilu kontumut ilineqartarlutik.

Ilaasortaanermut akiliutip nalinginnaasup annertussusia Nuna Tamakkerlugu Ataatsimeersuarnermi aalajangersarneqartarpoq.

Aningaasat pissarsiarineqartut partiimi immikkoortut assigiinngitsut akornanni agguataarneqarnissaat siulersuisuunernit aalajangerneqartarpoq.

Ilaasortaanermut akiliutissanik kinguaattooruteqarneq ilaasortat allattorsimaffiannit peerneqarnermik kinguneqarsinnaavoq.

§ 9

Atsiortussaaneq pisussaaffeqarnerlu

Partiip avammut pisussaaffii Ulluinnarni aqutsisuniipput.

Partiip pisussaaffigilersimasai ilaasortanut ataasiakkaanut tutsinniarneqarsinnaanngillat.

§ 10

Ileqqoreqqusanik allanngortitsineq

Matumani ileqqoreqqusanik allanngortitsinissamut Nuna Tamakkerlugu Ataatsimeersuarnermi taasisut 2/3-iisa aalajangiisimanissaat piumasarineqarpoq.

§ 11

Atorunnaarsitsineq

Partii atorunnaarsinneqassagaluarpat Nuna Tamakkerlugu Ataatsimeersuarnermi taaseqataasinnaasut 2/3-iisa isumaqatigiissimanissaat piumasarineqarpoq.

Atorunnaarsitsinissamik siunnersuuteqarnermi aamma partiip pigisaata nalillit qanoq atorneqarnissaannut siunnersuummik saqqummiussisoqassaaq.

§ 12

Isumaqatigiissitsiniarneq

Matumani ileqqoreqqusat atorneqarnerat pillugu isumaqatigiinngissuteqarnermi kiisalu nunap immikkoortuini immikkoortortaqarfiit akunnerminni aamma Demokraatit Inuusuttaasa kiisalu nunap immikkoortuini immikkoortortaqarfiit/ Demokraatit Inuusuttaasa Siulersuisuunerillu akornanni kiisalu kikkut partiimut immikkoortortaqarfimmulluunniit attuumassuteqartut isumaqatigiinngilissagaluarpata isumaqatigiissitsiniartartumut suliassanngortitsisoqarsinnaavoq.

Siulersuisuunerit isumaqatigiissitsiniartartumut suliassanngortitsinissamik aalajangiissapput. Isumaqatigiissitsiniartartumut suliassanngortitsinissaq Siulersuisuunernit itigartitsissutigineqarpat aalajangiineq Nuna Tamakkerlugu Ataatsimeersuarnermut suliareqqitassanngortinneqarsinnaavoq. Suliareqqitassanngortitsinissamik nalunaaruteqarneq aalajangiinermik paasitinneqarnermit kingusinnerpaamik ullut 14-it qaangiutsinnagit partiip allaffianut tunniunneqassaaq.

Isumaqatigiissitsiniartartoqatigiit pingasuussapput, isumaqatigiinngissuteqartut tamarmik ataatsimik toqqaassallutik, kiisalu taakku ataatsimut qinigaannik isumaqatigiissitsiniartoqassalluni. Isumaqatigiinniartitaasut isumaqatigiissitsiniartussamik isumaqatigiissinnaanngippata, taava Kalaallit Nunaanni Eqqartuussisuuneq toqqaasinneqassaaq. Tamatumunngalu innersuussutigineqarpoq peqqussut nr. 461 9. september 1975-imeersoq Kalaallit Nunaannullu atuuttussanngortitaanerani inatsit nr. 181 24. maj 1972-imeersoq isumaqatigiissitsiniartarneq pillugu.

Illuatungeriit arlaat isumaqatigiissitsiniarnissamut peqataajumanngippat, illua’tungiliuttup ajugaaneratut

isigineqassaaq.

Matumani ileqqoreqqusat nutarterneqartut immikkut ittumik nuna tamakkerlugu ataatsimeersuarnermi akuersissutigineqarnerisigut ullormi 9/12-2017 atortussanngortinneqarput.

Nuuk, ulloq 9/12-2017

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt