Anguniakkat.

Demokraatit partiitut anguniagaat siunertaallu

Partii kiffaanngissuseqarnermik pingaartitsisoq

Demokraatit partiiuvoq socialliberaliusoq, inuiaqatigiinnik inuup sapinngisamik annertunerpaamik kiffaanngissuseqarfigisaanik politikkikkullu nammineq aalajangiisinnaassuseqarfigisaanik pilersitsinissamik toqqammaveqartoq. Inunnut nunatsinnik alianaattorsuarmik asannittunut, inuiaqatigiinnillu inuit ataasiakkaat imminnut qaniginerpaasaminnullu sapinngisamik annertunerpaamik akisussaaffimmik tigusiffigisaannik pilersitseqataarusuttunut ineriartortitserusuttunullu partiiuvugut.

Inuup sapinngisamik annertunerpaamik kiffaanngissuteqarnissaata tunngavigineqarneratigut isumaqarpugut inuup ataasiakkaap inuunermik pitsaasumik pilersitsinissani annertuumik akisussaaffigigaa. Inuup ataasiakkaap pitsaasumik inuuneqarnissaa inuiaqatigiit akisussaaffiginngilaat. Inuiaqatigiit pisortallu sinaakkutissanik eqqortunik inuup ataasiakkaap suliffeqarfiullu ataasiakkaap ineriartorfigisinnaasaannik pilersitsinissaq isumagissavaat.

Namminersorlutik inuussutissarsiuteqartut inuiaqatigiinnut tamanut iluaqutaasumik aningaasarsiornissaminnut suliffinnillu pilersitsinissaminnut killeqanngitsunik sinaakkutissaqartinneqassapput. Aalisarneq, takornariartitsineq aatsitassarsiornerlu Demokraatinut tassaapput inuussutissarsiutit pissusissamisoortumik siuariartornissamut pitsaanerpaanik atugassaqarfiusut. Inuussutissarsiutinut taakkununnga sinaakkutissat atugassarititaasullu pitsaasut inuussutissarsiornerup iluani allatigut pitsaasunik sunniuteqassapput, taamatullu aamma inuiaqatigiinnut tamanut. Namminersorlutik inuussutissarsiuteqartut nunani allani unammillertiminnut unammillersinnaassapput, taamaammat ingerlatseqatigiiffinnut akileraarutit qaffasissusiat OECD-mi nunani qaffasissutsimit qaffasinnerussanngilaq – ajornanngippallu appasinnerusinnaalluni.

Killilersugaanngitsumik niuerfiit,  inuussutissarsiornerup niuernermik tunngaveqartup, killilersugaanngitsumillu unammilleqatigiinnerup sapinngisamik annertunerpaamik siaruarneqarnissaat qulakkeerniarlugu sulissutigaarput, taakku tamaasa aqqutigalugit innuttaasunut suliffeqarfinnullu assigiissaartunik naleqquttunillu atugassaqartitsinissaq qulakkeerneqassasoq qularutiginnginnatsigu. Tamatumunnga peqatigitillugu taamatut pullaveqarnerup nioqqutit kiffartuussinerillu akiisa sapinngisamik appasinnerpaanissaannik qulakkeerissaaq. Tamannalu tunngavigalugu pisortat ingerlatseqatigiiffiisa suliffeqarfinnut namminersortunut toqqaannartumik unammillernissaq peqataaffiginngisaannassavaat. Aammali eqqumaffigaarput kiffartuussinernik tunniuttakkat ilaasa, soorlu innaallagiaq, imeq kiassarnerlu, pisortanit ingerlanneqarpata pitsaanerpaasoq, taamaaliornikkut akitigut aaqqissuussineq naleqqunnerusoq assigiiaarnerusorlu qulakkeerneqassammat. Namminersortunngorsaanissarli piinnarlugu  namminersortunngorsaasoqassanngilaq.

Inuiaqatigiinni ilinniartitaanerup qaffasissusia siuariartorfiujuaannassaaq. Tamanna aningaasaliinernik annertuunik ingerlaavartunillu pisariaqartitsiffiuvoq. Meeqqat tamarmik minnerpaaffittut Meeqqat atuarfianni inaarutaasumik misilitsinneq angusimassavaat, aamma innuttaasut sapinngisamik amerlanerpaat inuussutissarsiuteqalernissamut piginnaanngortitsisartunik ilinniagaqassapput. Tamanna inuup ataasiakkaap imminut qanigisaminullu isumagisinnaanissaanik anguniagaqarnitsinnik qulakkeerissaaq. Aamma inuup ataasiakkaap suliffeqarnermi periarfissaasunut naleqqiullugu toqqaanissaminut kiffaanngissuseqarnissaanik qulakkeerissaaq. Uatsinnulli pingaaruteqarpoq erseqqissaatigissallugu ilinniagaqartut ataasiakkaat sapinngisamik pitsaanerpaamik angusaqarlutik ilinniakkaminnik naammassinninnissaminnut annertuumik akisussaaffeqarmata. Ataasiakkaat ilinniartitaanerannut inuiaqatigiit aningaasarpassuarnik aningaasalersuisarput, taamaammat inuttut pisussaaffigineqarpoq inuiaqatigiit inummut ataasiakkaamut aningaasaliissutigisimasaasa asuliinnartinneqannginnissaat anguniarlugu ilinniarsimasat atorlugit sapinngisamik ilungersuuteqarnissaq.

Kalaallit Nunaata sapinngisamik annertunerpaamik politikkikkut nammineerluni aalajangiisinnaassuseqalernissaa kissaatigaarput, inuiaqatigiinnili sanngiinnerpaat tamatumani pilliutigineqanngisaannassapput. Taamaammat isumaqarpugut susassaqarfinnut akisussaaffimmik tigusinissaq inuiaqatigiinni aningaasatigut periarfissat annertusiartornerisa peqatigisaanik ingerlanneqartariaqartoq. Taamatut suliaqarneq piffissalerneqarsinnaananilu ullulerneqarsinnaanngilaq, suliniuteqarnittali ilungersuuteqarnittalu politikkikkut nammineerluni aalajangiisinnaassuseqarnerup annertusarnissaanik inaarutaasumik anguniarneqartuarnissaa pingaaruteqarpoq. Naalagaaffeqatigiit peqataaffigitillugit tamatumunnga tunniussaqassaagut suleqatigiinnerlu ajunnginnerpaamik pissarsiaqarfigalugu. Suleqatigiinneq naligiissumik ataqqeqatigiiffiusumillu pissaaq.

Atorsinnaasat sinnerlugit ingerlatsinermut aningaasanik atuisoqannginnissaanik ileqqoq pitsaasoq pingaartipparput. Ima paasillugu, ukiumoortumik aningaasanut inatsisini amigartooruteqarnerit aatsaat periarfissaasariaqarput uppernarsarneqarsinnaappat amigartooruteqarneq assersuutigalugu sanaartornermut aningaasaliissuteqarnermik piffissap ingerlanerani imminut akilertussamik pissuteqarpat. Amigartooruteqarneq ingerlatsinikkut aningaasartuutit annertusisimanerinik pissuteqanngisaannassaaq. Inuiaqatigiinnik ingerlatsineq sunniuteqarluartuussaaq, ingerlaavartumillu sapinngisamik appasinnerpaaffimmiitinneqassalluni.

Pisortat suliassaqarfiini isumassuinermik suliaqartut suleriaatsillu sunniuteqarluartut ukkatarineqassapput. Peqqinnissaqarfiup allaffeqarfiani allaffimmiunik amerlanerusunik atorfinitsitsinata peqqissaasunik amerlanerusunik atorfinitsitserusunneruvugut. Eqqaamassavarput pisortat suliassaqarfii innuttaasut kisiisa pillugit atammata – pisortat suliassaqarfiisa annertusiartornerat immini iluatsitsilluarnertut isigineqanngisaannassaaq. Ikiorneqarnissamik pisariaqartitsivissortunik ikiuinissaq pisortat pingaarnertut suliassaraat. Sanngiitsunik napparsimasunillu sumiginnaanngisaannassaagut.

Innuttaasut aningaasat isertitatik sapinngisamik annertunerpaamik nammineq pigiinnassavaat. Sulinermit isertitanut akileraarutit tamatigut sapinngisamik appasinnerpaaffimmiitinneqassapput. Innuttaasut tassaapput sulisuusut, taamaammat aamma isertitamik sapinngisamik amerlanersaannik namminneq aqutsinissaat tulluarnerpaavoq.

Kalaallit Nunaat inuttussutsimigut nunaavoq mikisoq, taamaammat kikkut tamarmik assigiinngitsutigut imminnut ilisarisimapput. Inooqataanermut tunngatillugu isigissagaanni tamanna pitsaasuulluinnarpoq, aammali ajoraluartumik qanigisanik salliutitsinermut kammalaatersornermullu qaninnerulersitsivoq. Qanigisanik salliutitsineq kammalaatersornerlu tamakkiisumik akiorneqassapput. Tamanna tamakkiisumik ammasumik ingerlatsinikkut pitsaanerpaamik anguneqarsinnaavoq, taamaaliornikkut qulakkeertuaannarsinnaassagatsigu inuup piginnaasaqarnerpaap atorfimmik tunineqarnissaa, imaluunniit suliffeqarfiup piginnaasaqarnerpaap suliassamik tunineqarnissaa.

Politikkikkut aalajangiisinnaatitaaneq annertunerusoq

Kalaallit Nunaata politikkikkut annertusiartuinnartumik aalajangiisinnaatitaanissaa Demokraatit sulissutigiinnassavaat. Isumaqarpugulli tulleriiaarineq eqqortoq atorlugu ingerlatsisoqartariaqartoq. Kalaallit Nunaata namminersortutut naalagaaffinngornissaata aalajangersimasumik ullulerneqarnissaa kukkunerussaaq. Naalagaaffinngornissatsinnummi inuttut, ilinniartitaanikkut aningaasaqarnikkullu piareersimanissarput utaqqineqartariaqarpoq.

Namminiilivinnissamik oqallinneq paasinartumik misigissutsinik angisuunik imaqarpoq. Kinami nammineq illumini naalagaarusunngila? Oqallinnerullu isumatusaartumik ingerlanneqarnera misigissutsinit qallerneqassanngilaq. Naalagaaffinngortussap politikkikkut inunnullu tunngatillugu iluatsitsiffiulluarnissaa Demokraatit pingaartippaat. Tamannalu aatsaat anguneqarsinnaavoq piareersarluarsimagutta eqqarsaatigeqqissaarsimagutsigulu.

Siullertut pingaaruteqarpoq inuttut piareersimanissarput. Taamaammat isumaginninnikkut ajornartorsiutit annertuupilussuit millisarneqartariaqarput nunanilu Islanditut Danmarkitullu ittuni ajornartorsiutinut assingusunut nallersuunneqarsinnaasariaqarlutik. Assersuutigalugu kinguaassiutitigut kannguttaatsuliornerit, meeqqat inissinneqartarnerat, nakuusernerit toqutsinerillu amerlassusaat ikilisarneqartariaqarput. Ajornartorsiutit taakku taama atugaatiginerinut pissutaarpiartut nassaarisariaqarpagut, taamaaliornikkullu ikilisartariaqarlutigit.

Aappaattullu pingaaruteqarpoq ilinniagaqarnikkut piareersimanissarput, naalagaaffinngornermi sulisinnaasut pisortat allaffissornikkut ingerlatsineranni ilinniagartuutut atorfiit amerlanersaannik inuttalersornissaannut piareersimaqqullugit. Tamatuma saniatigut sulisinnaasut sinneri aamma ilinniarluarsimasariaqarput, sulisussanik sapinngisamik annertunerpaamik immitsinnut pilersorsinnaaqqulluta. Tamannalu atorfinnut tamanut tunngatillugu atuuppoq, assassorissanik suliaqartunit aningaaserivinni siunnersuisunut. Taamatullu anguniagaqarneq iluatsissinnaassappat meeqqat atuarfianni pissutsit ingerlaavartumik naleqqussarneqarlutillu pitsanngorsarneqartariaqarput, meerartavut nunani allani meeqqat suliatigut piginnaasaqarnerisut inissisimalersikkumallugit. Meeqqat atuarfiat meeqqatta ilinniartitaanikkut ingerlaqqinnissaannut toqqammaviuvoq.

Pingajuattullu pingaaruteqarpoq aningaasaqarnikkut piareersimanissarput. Demokraatit atugarissaarnerup kiffartuussinerullu maanna qaffasissusia millisikkusunngilaat, aamma akileraarutinik qaffaanissaq peqataaffigerusunngilarput. Taamaammat pisortat suliassaqarfiini aningaasartuutit qaffasissusiannik ingerlaavartumik naleqqussaanikkut aaqqissuusseqqinnikkullu, namminersorluni inuussutissarsiornerup iluani ingerlanneqartut qanoq iliorluni annertusarnissaannik ingerlaavartumik ukkatarinninnikkut aningaasaqarneq pitsanngorsarneqassaaq.

Demokraatit isumaqarput politikkikkut aalajangiisinnaatitaaneq periarfissat allarpassuit atorlugit annertusarneqarsinnaasoq namminersortutut naalagaaffinngunngikkaluarluni. Susassaqarfinnut arlalissuarnut akisussaaffiit naalagaaffimmit tigusinnaavagut, tassuunalu politikkikkut nammineq aalajangiisinnaatitaaneq, sukkassuseq nammineq kissaatigisarput sapinngisarpullu atorlugu ingerlaavartumik annertusarsinnaallutigu.

Taamaaliornikkut susassaqarfinnut pisariunerusunut akisussaaffiit namminersortutut naalagaaffinngornermik kinguneqartussat tigunissaat eqqissilluta sulissutigisinnaavagut. Namminersortutut naalagaaffinngornitsigut nunatut immitsinnut mattutissanngilluinnarpugut. Paarlattuanilli naalagaaffinngornikkut nunani tamalaani suleqatigiinneq ullumikkumut naleqqiullugu annertunerusumik peqataaffigilissavarput. Tamanna assersuutigalugu illersornermut, niuernermut, nunanut allanut silallu pissusianut tunngatillugu atuutissaaq. Kalaallit Nunaat nammineertoq nunarsuaq tamakkerlugu eqeersimaartumik suleqataassaaq.

Politikkikkut nammineq aalajangiisinnaanerup annertusarnissaanik sulissuteqarnitta peqatigisaanik Naalagaaffeqatigiinni suleqatigiinnermut eqeersimaartumik pitsaasumillu tunniussaqassaagut. Maannakkorpiaq inissisimaffigisatsinni Naalagaaffeqatigiinnut ilaasortaanerput aningaasaqarnitsinnut, inuiaqatigiit atugarissaarfiusut ingerlanneqarnerinut ilinniartitaanikkullu periarfissatsinnut  pingaaruteqarluinnartuuvoq. Tamanna puigussanngilarput. Tamanna tunngavigalugu Naalagaaffeqatigiinni suleqatigiinnermut pitsaasumik pullaveqarnissaq pingaaruteqarpoq, maanna inissisimaffigisatsinni Naalagaaffeqatigiinnut ilaanitsinni iluaqutissartaasut ajoqutissartaasunit amerlanerummata.

Ilinniartitaaneq sakkussatta pingaarnersaraat

Nunatta silarsuarmi nunarsuarmut siaruariartuinnartumi sunniuteqarluni inissisimalernissaata qulakkeernissaanut ilinniartitaaneq sakkussatta pingaarnersarivaat. Tamatumunngalu peqatigitillugu ilinniartitaaneq inuiaqatigiinnut atugarissaartunut toqqammavissaavoq piffissallu ingerlanerani namminersortutut naalagaaffinngornissatsinnik suliniuteqarnitta ilagalugu pingaaruteqarluinnartoq. Ilinniagaqarnitsinni ilisimasassat tunngaviulluinnartut pissarsiarisarpagut kingorna immikkut piginnaasaqarfigiligassagut. Ilinniartitaaneq qaammarsaanerlu atorlugit inuiaqatigiit paasilluarnissaannut toqqammavissaq tamakkerlugu ilinniartarparput. Aamma ilinniartitaaneq qaammarsaanerlu atorlugit nunanut allanut ammariartornissatsinnut ilisimasassat piginnaasassallu pissarsiarissavagut.

Ilinniartitaanikkut aaqqissuussinerput inuiaqatigiit inuussutissarsiortullu pisariaqartitaannut ingerlaavartumik naleqqussarneqassaaq, taamaaliornikkut ilinniagaqartitatta inuussutissarsiornerup iluani atorneqarsinnaanissaat pitsaanerusumik qulakkeerumallugu. Taamaammat inuiaqatigiit inuussutissarsiortullu piginnaasanik pisariaqartitaat ilinniakkatigut innuttaasunut neqeroorutigineqartuni salliutinneqassapput. Ilinniartitaanerup inuussutissarsiornerullu ataqatigiissinnissaannut naammassisaqarsinnaassutsillu qaffasinnerpaaffimmiitinnissaanut tamanna pingaaruteqartupilussuuvoq.

Tamannalu tunngavigalugu pingaaruteqarpoq ilinniartitaanikkut aaqqissuussinitta pitsaanerpaajunissaa, tamanut inissaqartitsisoq, suliatigut piginnaasaqarnerpaat unammilligassillutigit kajumilersillugillu, pikkorinnginnerusullu katataannginnissaat qulakkeerlutigu.

Taamaammat anguniakkatta pingaarnersaat tassaajuassaaq meeqqat atuarfinni atuartut ilinniarnermik  meeqqat atuarfianni inaarutaasumik misilitsinnermi angusiffigisinnaasaannik tamaasa neqerooruteqarfigissallugit, taamaaliornikkut tamarmik ilinniartitaanikkut ingerlaqqinnissamut inuussutissarsiuteqalernissamullu piginnaanngortitsisumik ilinniarnissamut periarfissillugit. Ilinniagartuutut ilinniagaqarneq inuussutissarsiutitigulluunniit ilinniagaqarneq matumani apeqqutaanngilaq. Ataasiakkaalli namminneq piginnaasamik sapinngisamik atorluarnissaannut ilinniakkamik toqqaanissaat pingaarnerpaavoq, tamanna inummut ataasiakkaamut inuiaqatigiinnullu naleqarnerpaassammat.

Tamatumunnga atatillugu pingaaruteqarpoq ilinniagaqarnersiuteqarnermut aaqqissuussinermik, illuatungaatigut ilinniartup ilinniakkamik aallussilluarnissaanik qulakkeerisussamik, illuatungaatigullu aamma ilinniartut ilinniakkaminnik naammassinninnissaannut suliffittaarnissaannullu kajumilersitsisussamik peqarnissarput.

Akileraarutit appasissut kiffaanngissusermik pilersitsisarput

Isertitanit akileraaruteqarnissaq pingaaruteqarpoq. Akileraaruteqarnikkut inuiaqatigiinni atuarfiit, napparsimmaviit, ikiortariallit ikiorneqarnissaat allallu qulakkeerneqartarput. Taamatullu oqareerluta, taava pingaaruteqarpoq eqqaamassallugu inuiaqatigiit tassaanngimmata aningaasarsiortut – innuttaasoq aningaasarsiortuuvoq. Demokraatillu isumaqarput innuttaasup nammineq aningaasaatimi sapinngisamik amerlanersaannik pigisaqarnissaata isumaginissaa inuiaqatigiinnut suliassaasoq. Taamaammat akileraarutit sapinngisamik appasitsinnissaat sulissutigiuarparput. Taamatullu pullaveqarneq innuttaasunut ataasiakkaanut malunnartinneqassaaq suliffeqarneq naammassisaqarnerlu imminut akilersinnaasoq.

Akileraartarnikkut aaqqissuussineq sapinngisamik pisariinnerpaajussaaq, aamma akileraarutit procentiat kommunimi najugaqatigiittunut tamanut assigiissaaq. Taamaammat akissarsiaqqortunernut akileraarutit akileraarutinullu procentit assigiinngisitaartut allat eqqunneqassanngillat.

Aningaasartuutit qaffasissusiata ukkatarinissaa aamma pingaaruteqarpoq. Akitsuut tassaaginnarpoq akileraarut toqqortigaq, taannalu equngasumik eqquigajuttarpoq, kikkut tamarmik qanoq isertitaqarnertik apeqqutaatinnagu assigiimmik akiliisinneqartarmata. Akiitsuutit ilaatigut pissuserisamut tunngassuteqartariaqarput, assersuutigalugu peqqinnanngitsut mingutsitsisullu peqqinnartunut silallu pissusianut tunngatillugu qajassuussinerusumik periarfissaasunut naleqqiullugit qaffasinnerusumik akitsuuserneqarlutik. Nioqqutissiaq kiffartuussinerluunniit ima qaffasitsigisumik akitsuuserneqassanngilaq niuerfiusup atorunnaarneranik kinguneqartitsilluni. Matumanilu inuup ataasiakkaap nammineerluni kiffaanngissuseqarnissaa Demokraatinut pingaaruteqarpoq – inuit pisiarerusutatik pisiarisinnaasariaqarpaat.

Ilaqutariit nukittuut inunnik nukittuunik pilersitsisarput

Ilaqutariinneq ataatsimoorfiit pigisatta nukittunersaraat qaninnerpaaffigisaralugillu. Inuunermi annikilliortilluta ilaqutariit qanittut nukimmik aallerfissaraagut. Ilaqutariit ulluinnarni asanninnermik, tapersersorneqarnermik isumassorneqarnermillu aallerfissaraagut. Aamma meerartatta isumassuinermik takutitsinissaq aamma mminnut allanullu akisussaaffeqarnissaq ilaqutariinni ilinniartussaavaat. Allatut oqaatigalugu ilaqutariit tassaapput inunnik nukittuunik nunatta siunissaata toqqammavigisassaanik pilersitsinissamut pingaaruteqarluinnartut.

Taamaammat ilaqutariit perorsaavittut toqqissisimaffigisatsitullu paarilluarnissaat pingaaruteqarluinnarpoq. Matumanilu ilaqutariit nalinginnaasuunerat, kattunneqarsimanerat imaluunniit allatorluinnaq inissisimanerat apeqqutaatinneqanngilaq.

Ilaqutariilli aaqqiissutissani pitsaanerpaajunnginnerinik paasisaqarnissatsinnut pikkorittariaqarpugut. Meeqqamut pitsaanerusussaq meeqqallu pitsaasumik inuuneqarnissaa angajoqqaat pisariaqartitaannit salliutinneqartuaannassapput, taamaammat aamma sumiginnaanermik paasisaqarnissamut aaqqissuussinermik sunniuteqarluartumik peqartariaqarpugut, sumiginnaasoqartillugulu iliuuseqarfigalugu, meeraq sumiginnagaasoq toqqammavimmi nutaami toqqissisimaqqilerniassammat tassuunalu inuttut nukittuunngorluni.

Isumaliortaatsikkut tunngavigisaq

Demokraatit isumaliortaatsikkut tunngavigisaat tassaavoq liberalisme aamma tamatumunnga qanittumik atasoq socialliberalisme. Isumaliortaaserput tassaavoq inuit tamarmik namminneq kissaatigisamittut kiffaanngissuseqarlutik inuusinnaasariaqartut, toqqagaat allat pisinnaatitaaffiinik innarliinngippata. Inuk kinaluunniit taamaalilluni nammineq kiffaanngissuseqarluni upperisamik toqqaasinnaavoq, isummersorluni, peqatigiiffiliorsinnaalluni katersuutsisinnaallunilu.

Inuup ataasiakkaap inuunerata aqunnissaa inuiaqatigiinnut suliassaanngilaq. Paarlattuanilli inuup ataasiakkaap – nammineq piumasani malillugu – sinaakkutissat inuiaqatigiinnit aalajangersarneqartut killiligaanani atorsinnaassavai.

Pisortat taamaalillutik innuttaasunut suliffeqarfinnullu killiliussanik pitsaanerpaanik atugassaqartitsinissamut nukitik tamaasa atussavaat, toqqaanissamut kiffaanngissuseqarnerup sapinngisamik annertunerpaanissaa siunertaralugu. Sinaakkutissat pitsaasunik pitsaassuutsimillu imaqarluarnissaat pisortanit akisussaaffigineqarpoq. Tamanna assersuutigalugu ulluunerani paaqqinnittarfeqarnermut, meeqqat atuarfiannut peqqinnissaqarfimmullu atuuppoq. Isumaginninnikkut aaqqissuussinerup pitsaasuunissaa pisortanit aamma akisussaaffigineqarpoq, innuttaasut ikiorneqarnissaminnik pisariaqartitsisut inuiaqatigiinnut isumalluutaaqqilersinnaanngorlugit tapersersuinermik pisariaqartitaminnik pisinnaanngortillugit.

Isumaqarpugut inuit tamarmik inuunerminni naligiimmik periarfissaqartinneqassasut. Ilinniartitaanermut, peqqinnissaqarfimmut atugarissaarnikkulluunniit iluaqutissanut atuuttunut tamanut tunngaviusunullu killiligaanngitsumik naligiissumillu atuisoqarsinnaanissaa pingaartuuvoq. Aningaasatigullu naligiinnginneq ajornartorsiutitut isiginngilarput. Inuiaqatigiinni suniluunniit aningaasatigut naligiinngittoqarsinnaavoq, inuit tamarmik pissusissamisoortumik assigiimmik isertitaqarsinnaanngimmata. Aningaasatigut taamatut naligiinngittoqarnera ajornartorsiutitut isiginngilarput, tamanna ilaatigut ilinniakkamik toqqaanermut, akunnerpassuarni sulinissamut piumassuseqarnermut tunngatillugu nammineq kajumissutsimik inuttullu toqqaanermik tunngaveqarmat.

Aningaasatigut naligiinnginneq aamma inummut ataasiakkaamut pitsaanerpaamik angusaqarniarnissamut kajumilersitsissaaq, tamannalu aamma inuiaqatigiinni atugarissaarnermut ataatsimoortumut annertusaataassalluni.

Inuup kiffaanngissuseqarnissaa pingaartillugu inunnik isiginneriaaseq

Isummakkut avammut ammanissaq liberalimik eqqarsartaatsimut pingaaruteqarluni ilaavoq. Isummakkut avammut ammanerup isumaa tassaavoq inuup kialluunniit qanoq eqqarsarnissaminut, qanoq upperisaqarnissaminut oqalunnissaminut qanorlu inuunerminik ingerlatsinissaminut kiffaanngissuseqarnerata akuerinissaa. Isumaqarluinnarpugut nammineq inuunerisamut akisussaaffeqarnissaq inunnullu allanut ataatsimoornermullu akisussaaqataanissaq inunni tamani pigineqartoq.

Taamaammat inuiaqatigiinnut pitsaasunut tunngavissaq tassaavoq inuit ataasiakkaat naammassisaqarnissaminnut namminneq akisussaaffeqarnerminnik misigisimanissaat, taamaaliornikkullu ataatsimoornermut tunniusseqataallutik. Inuup ataasiakkaap nammineq akisussaaffigisaanik arsaarutsigu, taava nammineersinnaassusiiagaassaaq, soriarsinnaajunnaarluni akisussaaffeerullunilu, tamannalu inummut ataasiakkaamut annertuumik akornutaaginnarani aamma inuiaqatigiinnut tamanut akornutaassaaq.

Inuup ataasiakkaap sapinngisamik annertunerpaamik nammineerluni kiffaanngissuteqarnissaata qulakkeerneratigut, ajunnginnerpaamik inuuneqarnissamut kajumissuseqalersinneqassaaq, tamannalu naggataatigut ataatsimoornermut iluaqutissanngussalluni. Inuit nukittuut nammineersullu nammineq kajumissutsimik ataatsimoorfinnik pilersitsinissaq pikkoriffigisarpaat aammalu assersuutigalugu timersoqatigiiffinni assigisaanilu nammineq kajumissutsimik suliaqarneq peqataaffigisarlugu.

Taamaaliornikkut inuup inuttut annertuumik kiffaanngissuseqarnera aamma nukittuumik ataatsimoorfeqarnissaq tamanut iluaqutaasussamik tamat ataatsimoorlutik tunniussaqarfigisaannik pilersitsinissaq qulakkeerneqassaaq.

Demokraatit inummut ataasiakkaamut taassumalu piginnaasaanut upperinninnerat annertuvoq. Inuimmi amerlanersaat namminneq avatangiisimillu ilimagisaannik pisinnaanerupput, pisortalli sinaakkusiussaannit pisoqalisimasunit unittooqqaffiusunillu noqinneqarput, tamannalu nutaaliorsinnaanermut sulerusussutsimullu akornutaavoq. Taamaammat pingaaruteqarluinnarpoq inuttut kiffaanngissuseqarnerup inuunermillu pitsaasumik nammineq toqqaasinnaanissap suli annerusumik ukkatarineqarnissaa.

Kiffaanngissuserli aamma akisussaaffimmik nassataqarpoq. Inuttut kiffaanngissuseqarneq inuttullu akisussaaffeqarneq (social)liberalistiskimik eqqarsarnermut atalluinnartuupput. Inuit kikkulluunniit pisortanik isumalluuteqaratik nammineernissaminnut periarfissaqarsinnaasariaqarput, aammalu ajornartorsiulaalerunik ingerlaannaq eqqarsassanngillat pisortat ikiuinissaminnut akisussaaffeqartut. Innuttaasut kikkulluunniit pisortanut saaffiginnissuteqannginnerminni nammineq ajornartorsiutigisaminnik aaqqiissuteqarnissaminnut imminnut tatigalutillu imminnut naleqartittariaqarput. Amerlanertigummi paasineqartarpoq nammineerluni aaqqiissutissarsisoqarsinnaasoq, taamatullu aaqqiissutissarsineq nuannaarnermik anginerusumik tunisisarpoq. Tamanna inuup ataasiakkaap imminut tatigineranik annertunerulersitsisarpoq tamanullu iluaqutaalluni.

Inuiaqatigiinnut iluaqutissaq annertusarneqassaaq

Demokraatit aningaasaqarnermik annertunerusumik nukittunerusumillu pilersitsinissaq kissaatigaat. Tamannalu kaagi atorlugu assersuusiorluni nassuiarneqarsinnaavoq. Assersuutigalugu oqarta kaffisortitsiniartutit. Lagkagiliorputit, taannalu qaaqqusat tamaasa akornanni agguarneqartussaavoq. Qaasut amerliartuinnartillugit tamarmik immikkut kaagisugassaat milliartortussaavoq.

Taava oqarta sapaatit akunnerata tulliani aamma kaffisortitsiniartutit. Tamatumuuna lagkagiliorputit marloriaammik anginerusumik. Qaaqqusat aamma taama amerlatigissapput, taamaammat tamarmik immikkut marloriaammik anginerusumik kaagisugassaqassapput.

Inuiaqatigiit aningaasaqarnerat kaagimut eqqartorneqartumut assinguvoq. Alliartortillugumi agguagassaqarneruleriartussaaq. Aningaasatigut sapinngisamik annertunerpaamik iluaqutissartaqarnissamik pilersitsinissaq Demokraatit ukkatariuassavaat, tamatumalu kingorna agguataarneqarnissaa oqaloqataaffigerusupparput. Takorloorneqarsinnaavoq akileraarutitigut oqilisaasoqarsinnaasoq, peqqinnissaqarfiup amerlanerusunik aningaasaliiffigineqarnissaa attaveqaatitigullu aningaasalersuisoqarluni. Kaagimi angisuujuppat, allatut oqaatigalugu periarfissat amerlanerungaassapput. Kaagili mikippat mikisukkuutaat agguarnissaat assortuussutigineqassaaq, tamannalu arlaannaataluunniit iluarinavianngilaa.

Makkununnga sinaakkutissat pisariaqartut pilersikkumallugit inuiaqatigiinnut kaagi annertusarusupparput:

  • Pinngortitami pisuussutitta, uumasut aatsitassallu, pitsaanerusumik atorluarneqarnissaat
  • Unammillersinnaassutsip naammassisaqarsinnaassutsillu pitsanngorsarnissaasa ingerlaavartumik ukkatarinissaat
  • Sulisinnaasut ilinniarluarsimanerusut
  • Pisortat suliassaqarfii annikinnerusut, eqaannerusut sunniuteqarluarnerusullu
  • Namminersorluni inuussutissarsiuteqarneq nukittunerusoq
  • Pisortat namminersortullu suleqatigiinnerat pitsaanerusoq
  • Aningaasaqarnermut politikkimut annertunerusumik allanngujuitsumillu akisussaassuseqarneq
  • Inummi ataasiakkaami inooqataanikkut eqqarsartaatsikkullu unammillernartut pinaveersaartinneqarnerisa annertunerusumik ukkatarineqarnissaat, inuttut sapinngisamik nukittunerpaamik toqqammaveqarnissaq qulakkeerniarlugu.

Namminersorlutik inuussutissarsiuteqartut siuariartornermik atugarissaarnermillu pilersitsissapput

Nunarput qujanartumik imartaqarpoq aalisakkanik qalerualinnillu pissaqartitsilluartunik, nunap iluani aatsitassaateqarpugut pinngortitarpullu immikkuullarissuuvoq alianaalluinnartuulluni. Pinngortitami pisuussutivut taakku aalisarnerup, aatsitassarsiornerup takornariartitsinerullu iluani aningaasarsiorluarnissatsinnut pissusissamisoortumik periarfissaqartippaatigut. Taakku atorluarnissaat pikkorinneruffigisariaqarparput, taakkunani pingasuni iluatsitsilluarneq suliaqarfinni allani iluatsitsilluarnermik kinguneqassammat, inuussutissarsiutit taamatut pilersinneqartut pissutigalugit.

Pisortat nunatsinni sumiiffinni assigiinngitsuni nutaaliornissamut isumassarsiarpassuarnullu aporfiunngisaannassapput. Pisortalli pitsaasunik sinaakkusersuinikkut malittarisassaqartitsinikkullu suliffeqarfinnut kulturimik suliaqarfinni taaneqartuni allanilu tamani aallarnisaanermik isumassarsianillu pitsaasunik ikorfartuissapput. Namminersorluni inuussutissarsiuteqarnerup nukittuujunissaa siuariartoqqinnissamik atugarissaarnerulernissamillu pilersitsinissamik kissaateqarnitsinnut pingaaruteqarluinnarpoq. Nammineerlunili takkunnavianngilaq.

Suliffeqarfiit namminersortut pikkoriffiginerpaasaminnut kiffaanngissuseqartittariaqarpagut, tassalu suliffinnik, atugarissaarnermik siuariartornermillu pilersitsineq. Allaffissornikkut suliniutinit paasiuminaatsunik pisariaqanngitsunillu pisarissersortinneqassanngillat. Paarlattuanilli suliffeqarfiit sapinngisamik annikinnerpaamik malittarisassiuunneqassapput, akileraartinneqarlutik tapiiffigineqarlutillu.

Nunarsuarmi unammilleqatigiinnermi ingerlalluarnissaannut aamma iluaqutigisaminnik pitsaasunillu sinaakkuteqartinneqassapput. Taamaammat ingerlatseqatigiiffinnut akileraarusersuinikkut procentip unammillersinnaassuseqartuarnissaa pingaaruteqarluinnarpoq. Nunani OECD-mut ilaasuni agguaqatigiissillugu qaffasissutsimit qaffasinnerusassanngilaq – aamma appasinnerusinnaavoq.

Aamma pingaaruteqarluinnarpoq inuussutissarsiortunut aningaasartuuterpassuit qaffasissutsimi naleqquttumiitittuarnissaat. Akitsuusersuineq inuiaqatigiinnit ima sakkortusarneqartigissanngilaq suliffeqarfiit aningaasalersuinissamut periarfissaannut aamma siuariartornermik suliffinnillu pilersitsinissaannut akornutaalerluni.

Tamatuma saniatigut pissusissamik eqquineq, sulinikkut ileqqorissaarneq sulinermilu pissutsit pitsaasut ukkatariuaannassavagut. Timikkut tarnikkullu sulinermi atukkat pitsaanerpaajuaannarnissaat inuussutissarsiortut ukkatariuaannassavaat. Tamanna napparsimalluni sulinngitsoornernik ikinnerusunik, sulisunik nuannaarnerusunik piffissarlu eqqorlugu suliartornermik kinguneqartarpoq. Sulisulli ataasiakkaat aamma akisussaaffeqarput. Suliniarluni suliartortoqartarpoq, piffissarlu eqqorlugu takkuttoqartarpoq. Suleqatit pisortarisallu ataqqinnittumik pineqassapput suliassallu sapinngisamik pitsaanerpaamik naammassineqassallutik. Suliffeqarfimmik pitsaasumik naammassisaqarfiulluartumillu pilersitsinissaq ataatsimoorluni suliassaavoq.

Isumaginninnikkut sillimaniarneq toqqissisimanermik qulakkeerissaaq

Tamatta napparsimaleratarsinnaalluta suliffitsinnik annaasaqaratarsinnaavugut. Matumanilu inuiaqatigiit isumaginninnikkut sillimaniarnermik toqqissisimanartumik qulakkeerinninnissaat pingaaruteqarpoq, sullinneqarneq kiffartuunneqarnerlu pisinnaatitaaffigisarput pisinnaaniassagatsigu.

Tamanna utoqqartatsinnut innarluutilittatsinnillu aamma atuuppoq. Utoqqalineq toqqissimanartuussaaq aamma innarluuteqartuulluni toqqissisimanartuussaaq. Inuiaqatigiinni eqimattat taakku ataqqinnittumik pineqartussaapput, pitsaasumillu inuuneqarnissaannut aningaasanik ikiuinermillu qulakkeerinnittoqassaaq.

Inuiaqatigiinnili eqimattanut tamanut atuuppoq imminut isumagisinnaagaanni taava aamma imminut isumagisariaqarpoq. Sanngiitsutut politikkikkut nassuiarneqartunut aningaasanik agguaassinissaq inuiaqatigiinnut suliassaanngilaq. Inuit arlaalluunniit assigiinngillat, aamma inuit assigiinngitsut assigiinngitsunik pisariaqartitaqarput. Isumaginninnermi inuit ataasiakkaat pisariaqartitaat isiginiarnerusariaqarpagut tamannalu tunngavigalugu iliuuseqarluta. Inunnut ikiorneqarnissaminnik pisariaqartitsisunut sullissineq pitsaanerpaaq taamaaliornikkut qulakkeerneqassaaq.

Sumi najugaqarnissamut kiffaanngissuseqarneq

Nunarsuatsinni ukiut kingulliit 100-t ingerlanerini nunaannarmit illoqarfinnut nutserneq annertooq pisimavoq. Illoqarfissuit alliartuinnarput inuillu sumiiffinnut ikinnerusunut katersuullutik. Illoqarfinnut nutserneq nunatsinni aamma atuuppoq.

Demokraatit isumaqarput inuit kikkulluunniit sumi qanorlu najugaqarnissartik aalajangissallugu  kiffaanngissuseqartariaqartut. Pisortat tamanna akuliuffigissanngilluinnarpaat. Inuilli ilisimasariaqarpaat najugaqarfinni mikinerusuni najugaqarneq akisunerugajuttartoq annikitsumik ingerlatsinermi akornutaasut pissutigalugit, aammattaaq ilisimaneqartariaqarpoq pisortat sullissinerat illoqarfimmut anginerusumut naleqqiullugu inukinnerusumi annikinnerusarmat.

Nunaqarfinni illoqarfinnilu aningaasalersuisoqarnissaata ukkatarinissaa pinnagu sumiiffiit inuussutissarsiornikkut siuariartornissamullu periarfissaqarfiusut ukkatarinerusariaqarpagut. Nunaqarfimmiuuneq illoqarfimmiuunerluunniit apeqqutaatinnagu pingaaruteqarpoq suliffeqarnissamut periarfissaqarnissaq meeqqallu atuarsinnaanissaat. Taamaammat assersuutigalugu inissianut pisortalluunniit paaqqinnittarfiinut aningaasalersuinissamut innuttaasut amerlassusaat tunngavigineqassanngilaq, taarsiulluguli sumiiffinni ataasiakkaani suut periarfissaanersut aalajangiisuusariaqarput.

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt