Anguniakkakka

Nunanut allanut sillimaniarnermullu sunniuteqarsinnaaneq sakkortunerulissaaq Massakkutulli Kalaallit Nunaat soqutigineqartiginikuunngilaq. Tamanna pingaarnertut peqquteqarpoq silap pissusiata allanngoriartorneranit aammalu pinngortitami pisuussutitsinnit. Uanga soqutiginninnerujussuaq periarfissatut isigivara. Tamanna annertunerpaamik iluaqutigiumallugu pisariaqartinneqarpoq Folketingimi nipi ersarissoq malunnartorlu.

Uanga qulakkeerniarpara nunanut allanut sillimaniarnermullu saqqumilaarneq nukittunerusoq nammineernerusorlu. Suliniarpunga Kalaallit Nunaannut pitsaanerpaamik – imaattariaqavinnani naalagaaffeqatigiinnermut pitsaasoq. Taamatut sulinerup nammineq naleqassuserput immitsinnullu paasinnittaaserput inuiaasutut nammineersinnaasutut nammineerniartutullu annertusissuaa.

Namminersorneq imaqarnerusoq
Sorsuutiginiarpara qallunaat naalagaaffiata aningaasaliiffigiuarlugillu ineriartortittuassagai Namminersornermik Inatsit malillugu susassaqarfiit angerlaassinnaasagut. Pingaarluinnarpoq susassaqarfinnik kinguussaaffiusimasunik angerlaassinnginnissarput.

Taamaattumik aatsaat taamak pingaaruteqartigivoq Folketingimi ilaasortatut qallunaat naalagaaffiat malinnaaffigilluarnissaa. Susassaqarfimmik angerlaassiniartilluta eqqarsaat aallaavigineqartussaq tassaavoq, angerlaassinerup inuiaqatigiitta ineriartortinneqarnerani iluaqutaassasoq.

Sulineq pimoorussisumik pullavigineqassaaq
Pimoorussiniarpunga suliassani sammisanilu naliginnaasumik qallunaat susassaqarfiisut naatsorsuunneqartartuni. Suliassani sammisanilu inuiannut tamanut sunniuteqartuusuni pisariaqarpoq Kalaallit Nunaata isumaa saqqummiuttassallugu. Danmarkip nunarsuarmi sunera aamma nunarsuarmioqatigiit Kalaallit Nunaannut isiginninnerannut sunniuteqarpoq. Assersuutigalugu pingaaruteqarpoq isummatsinnik annissisarnissarput sorsunnerni Danmarkip peqataaffigisaani, nunarsuarmut tamarmut avatangiisinut silallu pissusianut apeqqutinut kiisalu ileqqorissaarnermut apeqqutini nunasiartornermut tunngasuni.