|
Anguniakkakka
Folketingimi ilaasortatut suliassama pingaarnersarissavaat oqaluttuat eqqortut oqaluttuarisarnissaat. Kalaallit Nunaata Folketingimi ilaasortaatitai nunatta Danmarkimi EU-milu ambassadøriisut isigaakka. Folketingimi ilaasortatut makku suliassaraagut:
Kalaallit Nunaata soqutigisai aallutissallugit oqartussaaffinni suli angerlaanneqanngitsuni aamma immaqa ingerlaannaq angerlaanneqarunnanngitsuni.
Nunarsuarmi ammaraluttuinnartumi Kalaallit Nunaata inissisimaneranik qulakkeerinninnissaq.
Kalaallit Nunaat aqqutigalugu Danmarkip nunarsuup sinnerani inissisimalersimanerata Kalaallit Nunaanut iluaqutinngortinnissaa.
Kisianni allariikkakka iluaqutaanavianngillat peqataasinnaatitaanngikkutta uagut piumasagut tunngavigalugit. Inuuvugut nutaaliaasut Kalaallit Nunaata pinngortitarsuanik inuuniutillit. Tamatta inuussutiginngikkaluarlutigut, inooqatigaarput.
Inuunerput ukiut nikerarnerannut naleqqussartuassavarput. Inuussutissagut pinngortitarsuarmi aajuarniarpagut. Pisarnitsitut piniartarnerput aalisartarnerpullu ingerlattuassavarput. Imaanngilaq pisariaqarluinnarmat, inuunerput europamiut inooriaasiannut tulluussarsinnaagaluarparput, kisanni taamaaliornianngilagut, uaguugatta.
Inooriaaserput nutaalianngoriartortillugu, kulturikkut immikkut ilisarnaatitta attatiinnarnissaa akueritikkuminaalliartorpoq. Avatangiisitta puisinniarneq, arfanniarneq aavarnerlu pisariaqanngitsut isigaat, iluanaarutiginnissinnaaneq atuukkunnaarsimatillugu. Taamaattumik aatsaat taama pingaartigaaq, kikkuunerput oqaluttuarissallugu. Taamaaliornikkuinnaq allat paasinnilersissinnaavagut, kikkuunerpullu akueritillugu. Oqaluttuarissavarput taamaattuusugut kissaatigatsigu taamaakkusulluta. Tassa oqaluttuaq oqaluttuarerusutara.
|