|
Anguniakkakka
Namminersorneq pitsaassusilik
Uanga qilanaarivara, susassaqarfinnik amerlanernik tigusinissarput, taamaasilluta inuttut inuiattullu ineriartoqqissagatta. Piumasaqartariaqarpugulli. Qulakkeertariaqarpagut susassaqarfiit tigusassatta innuttaasunut kiffartuussineq ajorseriaateqartissanngimmagu. Tigussaasunngorlugu isumaqarpoq, susassaqarfiit aatsaat tigusassagigut, taakku ullutsinnut naleqquttunngoreeraangata, immitsinnut aningaasartuutilersuinnassanngikkutta.
Tamanna tunngavingalugu sulissutigissavara, suleqatigiissitamik immikkut ilisimasalimmik pilersitsinissaq, arlaannaanulluunniit attuumassuteqanngitsumik, taakkua qulaajassammassuk susassaqarfiit tigusinnaasatta massakkorpiaq inissisimanerat. Sulissutigissavarattaaq Qallunaat nalangaaffiata akisussaaffigisaaniittuusut aningaasaliivigiuarnissaat isumagissangaa.
Ataatsimut isigalugu inuiaqatigiitsinnut iluaqutaanissaat malillugu angerlaattassagigut. Assersuutigalugu pingaaruteqarluinnarpoq nunaqavissunik ilinniarsimasunik sulisinnaasunik peqarnissarput, tigusassatta pilersitassai eqqarsaatigalugit.
Kalaallit Nunaat nunarsuup qeqqani
Kalaallit Nunaata inissisimanera sorsunnersuup kingulliup kingorna sillimaniarneq eqqarsaatigalugu politikkikkut soqutiginartuuvoq. Siunissaq eqqarsaatigalugu Kalaallit Nunaat politikkikkut pingaarutilimmik silaannaap allanngoriartorneranik pissutilimmik soqutigineqarnerulernikuuvoq. Nordvestpassage aatsitassallu Kalaallit Nunaanniittut annertunerujartuinnartumik soqutigineqarneruleraluttuinnarputtaaq. Tamanna tunuliaqutaralugu pingaaruteqarpoq Folketingimi oqallinnerni sakkortuumik isummersornissarput. Iluaqutaanngilarmi tamakkununnga tunngasut Qallunaat nunaannut isumagitikkivut. Uagut malunniutilimmik oqartussaaqataassaagut.
Kalaallit Nunaat politikkikkut inerisimasumik akisussaassusilimmillu aallartitamik pisariaqartitsivoq.
Kalaaleqatikka sinnerlugit nunarsuarmioqataasutut politikkikkut sunneeqataallunga folketingi aallaavingalugu sulissaanga. Aallartitaassaanga inooriaasiinut akuulluarsinnaasoq, qallunaallu politikkeriinut naligiimmik unammillersinnaasumik oqaloqateqarusuttoq inerisitaqarusuttorlu. Assortuunnermiit oqaloqatigiinneq upperivara. Upperivara siunissamut isigineq pereersunut isiginninnermiit.
|