Kalaallit Nunaani Demokraatit, Demokraterne i Grønland

§ 1.

Ateq angerlarsimaffillu

Partii ateqarpoq Kalaallit Nunaani Demokraatit, Demokraterne i Grønland.

Partiip angerlarsimaffigaa Nuuk, Kalaallit Nunaat.

Siulersuisuunerit allaffeqarfiata najugaqarfigaa:

Namminersorlutik Oqartussat, Demokraatit, Postboks 132, 3900 Nuuk

§ 2.

Ileqqoreqqusat atorneqarnerat

Ileqqoreqqusat atorneqartussaapput partiimi tamarmi  Kalaallit Nunaani Demokraatini, Demokraterne i Grønland, partiip nunap ilaani immikkoortortaqarfiini aammalu Demokraatit Inuusuttaat/Demokraterne Ungdom.

§ 3.

Siunertaq

Demokratii tunngavigalugu Kalaallit Nunaanni innuttaasut naligiillutik assigiinnillu periarfissaqartitaallutik ingerlanissaat pilersinniassallugu.

Nunap nammineq pisuussutaasa imminut nammassinnaasumik atornerisigut nunap innuttaanut ineriartornissaq atugarissaarnissarlu pilersikkiartussallugit.

Tusagassiutit naqisimaneqanngitsut uparuartuisullu aqqutigalugit nunatsinni innuttaasut qanoq inissisimanitsinnik qanorlu periarfissaqarnitsinnik tusarlertassallugit.

Piviusunik siunnerfeqartunillu ilinniartitaanerup ilusilersorneratigut qulakkeerniassallugu innuttaasut suliffissaqarnissaat ilinniagaqarnissaallu.

Politikkikkut ingerlatsinermilu suliassani pisinnaasut tamarmik peqataatinneqarnerisigut innuttaasut ajunnginnerpaanik periarfissaqartitaanissaat anguniassallugu.

Ilisimatusarnermi suliarinnittarnermilu periaatsit periarfiusinnaasut allat atornerisigut qulakkeerniassallugu peqqinnissaqarfimmi pitsaanerpaanik atuinissaq nunatsinni tamarmi peqqinnerpaaffissamik angusiniarnermi.

Politikkikkut sulineq aqqutigalugu partiip politikkiata piviusunngortinnissaa sulissutigissallugu.

§ 4.

Ilaasortaanermi pissutsit

Stk. 1. Ilaasortanngorneq

Peqataalluni ilaasortanngorsinnaapput kikkulluunniit Kalaallit Nunaanni najugaqartut partiillu siunertaanut programmianullu ileqqoreqqusat piviusunngortinnissaannut sulissutiginnikkusuttut. 

Ilaasortanngorneq pisassaaq qarasaasiakkut partiip nittartagaatigut, www.demokrat.gl , imaluunniit partiip allaffianut saaffiginninnikkut najukkamiluunniit nunap ilaani immikkoortortaqarfimmut ilaasortanngorniartup najugaqarfigisaaniittup saaffigineratigut. Ilaasortanngorniarnermi nalunaarutigineqassapput oqarasuaatip normua najugarlu ukiorlu naatsorsuiffiusoq taanna nalunaarnermiit tamakkiisumik akilerlugu.

Demokraatit inuusuttaannut ilaasortanngorneq Demokraatit Inuusuttaanni pissaaq. Kalaallit Nunaanni Demokraatit Inuusuttaanni Demokraatinilu ataatsikkut ilaasortaasoqarsinnaanngilaq.

Siulersuisuunerit ilaasortanngorniarnermut itigartitsinernut aalajangiisinnaavoq.

Ilaasortaajunnaarsimasoq mattussaasimasorluunniit aatsaat ilaasortanngoqqissinnaavoq partiimut akiligassarisimasat akilerneqarpata. Ilaasortat Nuna tamakkerlugu ataatsimiinnermi ilaasortanut piumasaqaataasunut naammassinninngissimaneq pissutigalugu anisinneqarsimasut aatsaat ilaasortanngorteqqinneqarsinnaapput Nuna Tamakkerlugu Ataatsimiinnermi akuerineqarunik, najuuttut 2/3-iisa tamanna akuerippassuk.

Peqataanngikkaluarlutik ilaasortanngortinneqarsinnaapput inuit Kalaallit Nunaata avataani najugaqartut.

Stk. 2. Ilaasortaajunnaarneq anisitaanerlu

Ilaasortaajunnaarneq pisassaaq siulersuisuunernut nunap ilaani immikkoortortaqarfimmut Demokraatit Inuusuttaanulluunniit allakkatigut nalunaaruteqarnikkut. Ilaasortaq pisussaavoq ukiumut aniffimminut ilaasortaanermut akiliut tamakkiisoq akilissallugu.

Siulersuisuunerit nunap ilaani immikkoortortaqarfik Demokraatit Inuusuttaaluunniit tusarniaavigereerlugit aalajangiisinnaavoq ilaasortaq mattunniarlugu, taanna partiimut akornutaasumik iliuuseqarsimappat, partiip siunertaanut partiilluunniit programmianut akornutaasumik iliuuseqarsimappat, imaluunniit ileqqoreqqusat paarlagiarlugit iliuuseqarsimappat. Anisitsineq, aamma nunap ilaani immikkoortortaqarfinniit, partiimut tamarmut atuuppoq, aamma nunap ilaani immikkoortortaqarfinnut tamanut Demokraatillu inuusuttaaniik. Aalajangerneq ilaasortamit Nuna Tamakkerlugu Ataatsimiinermut ingerlateqqinneqarsinnaavoq, tassanilu anisitsineq najuuttunit taasisinnaasut 2/3 amerlanerussuteqarpata anisitsineq atuuttussanngortinneqassalluni. Suliareqqitassanngortitsisneq partiip allaffianut nalunaarutigineqarsimassaaq kingusinnerpaamik anisitaanermut ilisimatinneqarnermiit  ullut 14 qaangiuppata.

Siulersuisuunerit aalajangersinnaavaat suliassanngortitsinerup nalaani ilaasortamut mattussigallarnissaq. Ilaasortaq mattussaagallartoq partiimut sinniisuusinnaanngilaq, aamma nunap ilaani immikkoortortaqarfinni tamani Demokraatillu Inuusuttaani.

Ilaasortaq aamma siulersuisuunerniittoq mattussaatinniarlugu aalajangertoqassappat, tamanna siulersuisuunerinnarni nunap ilaani immikkoortortaqarfimmiluunniit pisinnaanngilaq, taamaallaat Nuna Tamakkerlugu Ataatsimiinnermi najuuttut taasisinnaatitasut 2/3-iisa aalajangiinerisigut.

Nunap ilaani immikkoortortaqarfiit ilaasortaannarnik anisitsisinnaapput. Aalajangerneq ullut 14 qaangiutsinnagit Siulersuisuunernut ingerlateqqinneqarsinnaavoq. Siulersuisuunerit aalajangernerat tamatuma kingorna Nuna tamakkerlugu Ataatsimiinnermut suliassanngorteqqinneqarsinnaavoq qulaani taaneqartut aalajangersakkat naapertorlugit.

Stk. 3. Ilaasortat pisinnaatitaaffii pisussaatitaaffiilu

Ilaasortat pisussaatitaapput partiip ileqqoreqqusai  malissallugit partiillu siunnerfinnut aalajangersugai partiillu programmia ataqqissallugit.

§ 5.

Siulersuisuunerit

Stk. 1. Qinersineq

Partiip ulluinnarni aqunneqarnera siulersuisuunernit arfineq marlunnik ilaasortaqartumit ingerlanneqassaaq.

Siulittaasup peqannginnerani politikkikkut siulittaasup tullia tassunga taartaasassaaq.

Piffissaanngitsukkut siulersuisuunernut ilaasortaq qimagutissappat, siulersuisuunerit Nuna Tamakkerlugu Ataatsimiinnermi qinigaasimasumik sinniisussamik naammaqusissapput, imaluunniit, sinniisussamik piareersimasoqanngippat, siulersuisuunerit namminneq piukkussaannik.

Stk. 2. Siulersuisuunerni sulineq

Siulersuisuunerit qanoq ingerlatseriaaseqarnissartik namminneq aalajangissavaat. Siulersuisuunerit ataatsimiinnerat pisassaaq siulittaasup pisariaqartitsineratigut, imaluunniit siulersuisuunernut ilaasortat marluk tamanna piumasarippassuk. Ataatsimiigiaqqussut allaganngorlugu oqaluuserisassanillu ilaqartillugu nassiunneqassaaq.

Siulersuisuunerit ataatsimiinnerat pisinnaavoq telefonikkut, videokonference atorlugu - pisulluunniit imaalisissimappassuk mail atorlugu.

Siulersuisuunerit ataatsimiinnerini aalajangikkat imaqarniliorneqassapput, taakkulu ataatsimiinnermi tullermi akuersissutigineqassapput imaqarnersiuisumillu atsiorneqassallutik.

Siulersuisuunerit amerlanerussuteqarneq aallaavigalugu aalajangiisassapput, aatsaalli aalajangiisinnaallutik ikinnerpaamik siulersuisunut ilaasortat sisamat najuukkaangata. Taasinerit amerlaqatigiissillugit siulittaasup taartaataluunniit taasinera aalajangiisuusassaaq. Pisinnaatitsilluni taasisoqarsinnaavoq.

Siulersuisuni sinniisut tamarmik siulersuisut ataatsimiinneranni ilaasinnaatitaapput, oqaaseqarsinnaallutik, kisiannili taaseqataasinnaanatik. Nunap ilaani immikkoortortaqarfiit Demokraatiillu inuusuttai sinniisumik ataatsimik ataatsimiinnerni peqataatitaqarsinnaaput oqaaseqarsinnaallutik, kisiannili taaseqataasinnaanatik.

Siulersuisup siulersiusunilu ilaasortaq ataaseq peqatingalugu aaliangiisinnaapput sammisat ataasiakkaat taamaallaat siulersuisuni qinersisinnaasunik peqataaffigineqassasoq.

Stk. 3. Ulluinnarni ingerlatsinermut ataatsimiititaq

Siulersuisut akunnerminnit pilersissavaat ulluinnarni ingerlatsinermut ataatsimiititaq ukuninnga ilaasortalik siulittaasoq, aningaaserisoq sulilu ilaasortat marluk suliani annikinnerusuni siulersuisuunerit sinnerlugit utaqqisinneqarsinnaanngitsuni iliuuseqarsinnaatitaasut. Ulluinnarni ingerlatsinermut ataatsimiititaq aalajangiisinnaassuseqarpoq ikinnerpaamik pingasut najuuppata. Ulluinnarni ingerlatsinermut ataatsimiititat aalajangiifiigisimasaat siulersuisut ataatsimiinneranni siullermi saqqummiunneqassapput siulersuisunit akuerisassanngorlugit.

Stk. 4. Suliassat

Siulersuisuunerit partiip avammut iluminilu pisariaqartitai suliarissavaat. Taassumalu iluani pisussaaffiuvoq siulersuisuunerit pisussaammata partiip atorfeqartitaasa sulinerat nakkutigissallugu.

Siulersuisuunerit aalajangertassavaat partiip nunap ilaani immikkoortortaqarfinnut imaluunniit/aammas Demokraatit ’Inuusuttaanut tapiissuteqarsinnaanera aningaasartalerneqarnissaallu isumagissallugu.

Siulersuisuunerit pisariaqartillugu akilerlugu sulisitsisinnaapput.

Stk. 5. Folketingimut, inatsisartunut, kommunalbestyrelsenut nunaqarfinnilu siulersuisunut qinigassanngortitsisarneq 

Siulersuisuunerit aalajangissavaat kikkut Inatsisartunut folketingimullu kiisalu aaqqissuussinernut partiip sunniuteqarfigisinnaasaanut qinigassanngortissanersut Nunap ilaani immikkoortortaqarsimanngippat aamma siulersuisuunerit aalajangersinnaapput kikkut partii sinnerlugu illoqarfimmi nunaqarfinniluunniit kommunalbestyrelsinut nunaqarfinnilu siulersuisunut partii sinnerlugu qinigassanngortissanersut.

Qinigassanngortitat partiimut ilaasortaassapput, imaluunniit Demokraatit Inuusuttaani ilaasortaanermullu akiligassaqassanatik.

§ 6.

Nuna Tamakkerlugu Ataatsimiinneq

Stk. 1. Partiip, nunap ilaani immikkoortortaqarfiit Demokratillu Inuusuttaasa qullersaat tassaavoq Nuna Tamakkerlugu Ataatsimiinneq

Stk. 2. Qaqugukkut pisarnissaa ataatsimiigiaqqusinerlu

Pisarnertut Nuna Tamakkerlugu Ataatsimiinneq ukioq allortarlugu pisassaaq Inatsisartut Ukiakkut Ataatsimiinnerannut atasumik. Immikkut ittumik nuna tamakkerlugu ataatsimiittoqassappat pisariaqartitsineq malillugu siulersuisuunerit qaaqqusisinnaapput, qaaqqusisoqassaarlu ikinnerpaamik siulersuisuunernut ilaasortat 2/3-iisa imaluunniit nunap ilaani immikkoortortaqarfiit 3/5-iisa pissutaasoq taallugu kissaatigippassuk.

Qaaqqusineq ullormut oqaluuserisassanik ilaqartillugu nassiunneqarsimassaaq qaammammik periarfisssiinikkut.

Stk. 3. Ataatsimeeqataasinnaatitaasut

Nuna Tamakkerlugu Ataatsimiinnermi partiimut ilaasortat imaluunniit  Demokraatit Inuusuttaani tapersersuisullu tamarmik peqataasinnaapput. 

Stk. 4. Taaseqataasinnaasut

Nuna Tamakkerlugu Ataatsimiinnermi nunap ilaani immikkoortortaqarfiit tamarmik Demokraatillu Inuusuttai siulersuisuunernilu ilaasortat tamarmik taaseqataasinnaapput.

Nunap ilaani immikkoortortaqarfiit tamarmik Demokraatillu Inuusuttai aallartitartik aqqutigalugu ataatsimik taasisinnaapput. Aallartitaasup 31. december nunap ilaani immikkoortortaqarfimmut imaluunniit Demokraatit Inuusuttaani ilaasortat akiliisimasut quliugaangata taasinermik ataatsimik taasissutigisassavai, taamaattorli ikinnerpaamik ataatsimik taasisinnaalluni. 

Stk. 5. Qinigassanngortinneqarsinnaasut

Kikkulluunniit partiimut ilaasortaasut aamma Demokraatit Inuusuttaani inissanut sunulluunniit qinigassanngortissinnaapput.

Stk. 6. Angalanermut aningaasartuutit

Nuna Tamakkerlugu Ataatsimiinnermut angalanermi najugaqarnermilu aningaasartuutasaasut nunap ilaani immikkoortortaqarfimmit/ Demokraatit Inuusuttaanit aallartitaasoq sinnerlugu aallartitaasukkut akilerneqassapput.

Siulersuisuunerit aalajangersinnaapput aningaasartuutit tamakkerlugit ilaannaalluunniit akilerniarnerlugit.

Stk. 7. Ingerlanneqarnera

Nuna Tamakkerlugu Ataatsimiinnermi isumaqatigiinniarnerit ingerlanneqassapput aqutsisoq pisortaralugu, taannalu ataatsimeeqataasunit qinerneqassaaq, siulersuisuunernullu ilaasortaassanani.

Peqataasut telefonikkut videokonference-kulluunniit peqataasinnaapput.

Pisarneq malillugu Nuna Tamakkerlugu Ataatsimiinnermi partiip suliarisai pillugit siulersuisut nalunaaruteqassapput immaqalu partiip programmianuut allannguutaasinnaasunik akuersissutissanik saqqummiussissallutik.

Saniatigut ukiup qaangiuttup naatsorsuutai ukiumullu tullermut aningaasatigut pilersaarutit akuersissutigisassanngorlugit, soorlu aamma ukiumut tullermut naatsorsuutinut ilaasortat akiliuteqarnissaat Nuna Tamakkerlugu Ataatsimiinnermit naqissuserneqassasut.

Siulersuisuunerit Nuna Tamakkerlugu Ataatsimiinnermi tulliup tungaanut qinerneqassapput. Nuna Tamakkerlugu Ataatsimiittut immikkut siulersuisuunerit siulittaasussaat, Politikkimi siulittaasup tullia, aaqqissuussaanikkut siulittaasup tullia, aningaaserisoq, sinniisussallu arfineq marluk tikillugit qinissavaat. Taakku saniatigut Nuna Tamakkerlugu Ataatsimiittut kukkunersiuisoq qinissavaat. Qinigaaqqittoqarsinnaavoq.

Siulersuisuunerit namminneq allatsi inississavaat.

Siunnersuutit ilaasortaneersut, ullormut oqaluuserisassat saniatigut saqqummiukkumaneqartut, siulersuisuunerneereertussaapput Nuna Tamakkerlugu Ataatsimiinneq ullunik 14-inik sioqqullugu, tiguneranniillu piaarnerpaamik immikkoortortaqarfinnut nassiunneqassallutik. Ullormut oqaluuserisassatut ilanngunneqarsimanngitsut, imaluunniit piffissaagallartillugu tiguneqarsimanngitsut ilanngunneqarsinnaapput Nuna Tamakkerlugu Ataatsimiinnermi najuuttut 2/3-imik amerlanerussuteqarlutik tamanna akuerippasssuk.

Nuna Tamakkerlugu Ataatsimiinnermi aalajangiinerit amerlanerussuteqarnikkut aalajangerneqartassapput, tamanna ileqqoreqqusami ukunani allatut allassimasoqanngippat. 

Ataatseeqataasinnaatitaasoq ataaserluunniit kissaateqarpat taasinerit allakkatigut ingerlanneqassapput. Qarasaasiakkut taasinerit aqutsisumut ingerlanneqartassapput. Pisinnaatitsissutikkut taasisoqarsinnaavoq, taamaattorli pisinnaatitsissut partiimi ilaasortamut ataasiinnarmut tunniunneqarsinnaavoq.

§ 7.

Nunap ilaani immikkoortortaqarfiit Demokraatillu Inuusuttai

Partiimut nunap ilaani immikkoortortaqarfiit pilersinneqarsinnaapput ilaasortat ikinnerpaamik tallimat pilersitsinissaq kissaatigippassuk. Nunap ilaani Immikkoortortaqarfimmi ataatsimi taamaallaat ataatsimik nunap ilaani immikkoortortaqarsinnaavoq. Nunap ilaani Immikkoortortaqarfiit kommunip killeqarfia 31. december 2011-meersoq malissavaa, taamaasilluni Tunu, tassunga ilanngullugu Tasiilaq, Ittoqqortoormiit kiisalu Danmarkshavn nunap ilaani immikkoortortaqarfiussaaq immikkut. Nunap ilaani immikkoortortaqarfimmi peqatigiiffiup aqqa aallartissaaq Demokraatit malitseqarluni nunap ilaani immikkoortortaqarfiup aqqanik, immikkoortortap angerlarsimaffianik. Tunumi Nunap ilaani immikkoortortaqarfik taaguuteqassaaq Demokraatit Sermersooq Tunu. Sumiiffiit kommunit killeqarfiisa avataaniittut soorlu Pituffik, nunap ilaani immikkoortortaqarfianut qaninnerpaamut ilaassaaq. Nunap ilaani immikkoortortaqarfinni tamatigut siulersuisut ikinnerpaamik pingasuussapput. Nunap ilaani immikkoortortaqarfimmi ileqqoreqqusat siulersuisuunernit akuersissutigineqassapput nunap ilaani immikkoortortaqarfiullu partiip programmia akuersissutigisimasariaqarpaa. Nunap ilaani immikkoortortaqarfiup akuerisariaqarpaa nuna tamakkerlugu ileqqoreqqusat nunap ilaani immikkoortortaqarfiit ileqqoreqqusaannit pingaarnerummata. Nunap ilaani Immikkoortortaqarfiup aningaasaqarnera nammineq aqussuaa nalunaarsortarlugillu isertitat aningaasartuutillu. Nunap ilaani immikkoortortaqarfiup aningaasaqarnera Nuna tamakkerlugu peqatigiiffiup naatsorsiortarneranut ilaassaaq taamaattumik nammineq immikkut naatsorsuusiortassanngilaq.

Nunap ilaani immikkoortortaqarfimmi siulersuisut aalajangiisinnaassuseqanngikkaangata siulersuisuunerit aalajangersinnaavaat nunap ilaani immikkoortortaqarfimmi ataatsimeersuartoqassanersoq.

Nunap ilaani immikkoortortaqarfimmi siulersuisut aalajangissavaat kikkut partii sinnerlugu kommunalbestyrelsimut nunaqarfimmiluunniit siulersuisunut sassartinneqassanersut. Nunap ilaani immikkoortortaqarfiup taamaallaat partii sinnerlugu sassartinneqartussanik toqqaasinnaavoq nunap ilaani immikkoortortaqarfimmi imaluunniit Demokraatit Inuusuttaani ilaasortaappat kommunimilu tassani najugaqartuuppat. Demokraatit Inuusuttai nunap ilaani immikkoortortaqarfiani peqatigiiffimmut kommunalbestyrelsimut nunaqarfimmmilu aqutsisunut qinigassanngortittussanik inassuteqarsinnaavoq.

Ukiut tamaasa kingusinnerpaamillu 31. december nunap ilaani immikkoortortaqarfiit siulersuisuunernut nalunaarutigisussaavaat kikkut nunap ilaani immikkoortortaqarfimmi siulersuisuniinnersut, qanoq ateqarnersut sumilu najugaqarnersut.

Inuusuttut immikkoortortaqarfiata ataqqissavaa nuna tamakkerlugu malittarisassat inuusuttunu immikkoortortaqarfiup malittarisassaanut naleqqiullugu pingaarnerummata.

Inuusuttunut immikkoortortaqarfik nammineq atugassaminik malittarisassiortassaaq Siulersuisuunernit akuerineqartussanik.

Inuusuttunut immikkoortortaqarfik ikinnerpaamik tallimanik ilaasortaqassaaq siulersuisunilu ilaasortaassapput ikinnerpaamik pingasut.

Inuusuttunut immikkoortortaqarfiup siulersuisui aalaangiisinnaassuseqanngippata, siulersuisuunerit aalajangersinnaavaat inuusuttunut immikkoortortaqarfik ataatsimeersuassasoq.

Inuusuttunut immikkoortortaqarfiup nammineq inuusuttunut immikkoortortaqarfiup aningaasaqarnera aqussavaa namminerlu isertitat aningaasartuutillu nalunaarsortarlugit.

Inuusuttunut immikkoortortaqarfiup aningaasaqarnera Nuna tamakkerlugu peqatigiiffiup naatsorsiortarneranut ilaassaaq taamaattumik nammineq immikkut naatsorsuusiortassanngilaq.

§ 8.

Naatsorssuutit naleqartunillu pigisat

Partiip naatsorsuutaasa ilaasortallu ukiumut akiliutaasa qaammatisiutit malillugit nikittarneq malippaat.

Naatsorsuutit pisarneq malillugu Nuna Tamakkerlugu Ataatsimiinneq sioqqullugu kukkunersiuisumit kukkunersiorneqarsimassapput.

Nuna Tamakkerlugu Ataatsimiinnermit kukkunersiuisutut qinigaasimasup sukkulluunniit piumasarisinnaavaa naatsorsuutit bilagii aningaasallu uninngasut takujumallugit, arlaatigullu equngasoqarsimassappat pisussaalluni siulersuisunut taamaattoqarsimasinnaanera nalunaarutigissallugu.

Aningaaserisup isertitassat piniartussaavai akiligassallu siulersuisut akuerisimasaat akilertussaallugit. Aningaaserisoq isertitanut akilikkanullu tamanut naatsorsuuteqassaaq ima isikkulinnik, partiip piffimmi tassani qanoq aningaasatigut inissisimanera takusinnaanngorlugu, ukiumullu naatsorssuutit suliarissallugit.

Partiip aningaasaatai aningaaserivimmiitinneqassapput.

Nunap ilaani immikkoortortaqarfiup Demokraatit inuusuttuilu immikkoortortaqarfiata aningaasaatai tingoriaannaat Nuna tamakkerlugu peqatigiiffiup aningaaserivimmi kontuanut ikineqartassapput. Nunap ilaani immikkoortortaqarfik aamma inuusuttut immikkoortortaqarfiat aamma nammineq immikkut aningaaserivimmi kontumik pilersitsisinnaapput aningaasaatinik tigoriaannarnik ikisiffissanik. Nunap ilaani immikkoortortaqarfik aamma inuusuttut immikkoortortaqarfiat qaammatit pingasukkaarlugit aningaasatigut inissisimaneq pillugu Siulersuisuunerit aningaaserisuannut nalunaarusiortassapput aamma siulersuisuunerit aningaaserisuat qaammatit pingasukkaarlugit aningaasatigut killiffik pillugu Nunap ilaani immikkoortortaqarfiinut kiisalu inuusuttut immikkoortortaqarfiannut nalunaarusiortassaaq. Nunap ilaani immikkoortortaqarfiup aamma inuusuttut immikkoortortaqarfiat kingusinnerpaamik januarip naalernerani siulersuisuunerit aningaaserisuannut balancemik nassiussisassaaq naatsorsuusiornermi atorneqartussamik.

§ 9.

Atsiortussaaneq pisussaaffeqarnerlu

Partiip avammut pisussaaffi ulluinnarni aqutsisuniipput. 

Partiip pisussaaffigilersimasai ilaasortanut ataasiakkaanut tutsinniarneqarsinnaanngillat.

§ 10.

Ileqqoreqqusanut allanngortitsinerit

Ileqqoreqqusanut ukununnga allanngortitsinissamut piumasarineqarpoq Nuna Tamakkerlugu Ataatsimiinnermi taasisut 2/3-iisa aalajangiisimanissaat.

§ 11.

Atorunnaarsitsineq

Partii atorunnaarsinneqassagaluarpat piumasarineqarpoq Nuna Tamakkerlugu Ataatsimiinnermi taaseqataasinnaasut 2/3-iisa isumaqatigiissimanissaat.

Atorunnaarsitsinissamut siunnersuummi aamma peqataatinneqassapput partiip nalilinnik pigisai qanoq atorneqassanersut.

§ 12. Isumaqatigiissitsiniarneq

Ileqqoreqqusap uuma atuunneranut isumaqatigiinngittoqassappat nunap ilaani immikkoortortaqarfiillu akunnerminni isumaqatigiinngilissagaluarpata, nunap ilaani immikkoortortaqarfik Demokraatit Inuusuttaallu, aammalu nunap ilaani immikkoortortaqarfiit/Demokraatit Inuusuttai siulersuisuunerillu isumaqatigiinngilissagaluarpata kikkullu partiimut nunap ilaani immikkoortortaqarfimmulluunniit attuumassuteqartut isumaqatigiinngilissagaluarpata isumaqatigiissitsiniartartumut suliassanngortinneqarsinnaavoq. Siulersuisuunerit aalajangissavaat isumaqatigiissitsiniartartumut tunniussisoqassanersoq. Siulersuisuunerillu isumaqatigiissitsiniartoqarnissaa itigartissagaluarpassuk tamanna Nuna Tamakkerlugu Ataatsimiinnermut aalajangiiffissanngorlugu  ingerlateqqinneqarsinnaavoq. Ingerlatitseqqinnissamut nalunaarut partiip allaffianut ingerlatinneqarsimassaaq kingusinnerpaamik aalajangiinermiit ullut 14-it qaangiunneranni.

Isumaqatigiissitsiniartartoqatigiit pingasuussapput, isumaqatigiinngissuteqartut tamarmik ataatsimik toqqaassallutik, kiisalu taakku ataatsimut qinigaannik isumaqatigiissitsiniartoqassalluni. Isumaqatigiinniartitaasut isumaqatigiissitsiniartussamik isumaqatigiissinnaanngippata, taava Kalaallit Nunaanni Eqqartuussisuuneq toqqaasinneqassaaq. Tassungalu innersuussutigiumaneqarpoq peqqussut  nr. 461  9. september 1975-imeersoq Kalaallit Nunaannullu atuuttussanngortitaanerani inatsit  nr. 181  24. maj 1972-imeersoq isumaqatigiissitsiniartarneq pillugu.

Akerleriit arlaat isumaqatigiissitsiniarnissamut peqataajumanngippat, illua`tungiliuttup ajugaaneratut isigineqassaaq.

-------0------

Malittarisassat uku iluarsaassat atuutilissapput ulloq 29. december 2011 siulersuisuunernit akuerineqareerpata. Siulersuisuunerit Nuna tamakkerlugu Ataatsimiinerup ulloq 17. december 2011 aalajangiinerisigut, pisinnaatitaapput malittarisassanik iluarsaassanik akuersinissaminnut taakkuninngalu atortussanngortitsinissamut.

Nuuk, ulloq 29. december 2011

Siulersuisuunerit ulloq 29. december 2011 ataatsimiinneranni akuerineqarpoq.