Immikkut katersuuttoqassanngilaq Created by Hanne on 03-02-2012 16:00:41
 |
Siumup Inatsisartut immikkut ataatsimiisinneqarnissaat eqqarsaatigisariaqanngilaa. Demokraatini paarlattuanik Siumut kaammattorusupparput, Inatsisartut upernaakkut ataatsimiinnissaannut apriliup ulluisa 13-ani aallartittussami aatsitassarsiornermut inatsisip oqaluuserineqarnissaanut eqqarsaqqullugu. |
Takunngitsuugassaanngilaq Siumut suarsunnguit tamaasa naammagittaaliutiginiarsarigai. Kingulleq tupigusuallaatiginngitsuugassaanngitsoq tassaavoq piumasaqalermata Inatsisartut immikkut ataatsimeeqqullugit. Siumut – isumaqaleriataarsimavoq – inuiaqatigiit aatsitassarsiortunit aningaasanik ikippallaanik aallertartut, tamannalu tunngavigalugu partiip piumasarileriataarpaa inatsisit allanngortinneqassasoq.
Demokraatini Siumumut eqqaasitsissutigisariaqarparput, ullormiit ullormut inatsisit allanngortinneqarneq ajormata. Siumup piumasarisaatut inatsit allanngortinneqassappat, taava sivisuumik sukumiisumillu tusarniaasoqaqqaartariaqarpoq piffissamilu tassani nunatsinni ineriartorneq unittariaqassaaq, naatsorsuutigineqarsinnaanngimmat aatsitassarsiorfiit amerlanerit sumiiffimmut nalorninartumik inatsisilimmut aningaasaleerusussuseqarnissaa taamaasillutillu aamma ingerlatseqatigiiffiit aningaasarsiorfigisinnaasaattut qularnartumi.
Siumut suliamut tutsuviginarnerusumik isummersortariaqaraluarpoq. Partip sulissutigilereertariaqaraluarpaa aatsitassanut inatsimmut allannguutissamik eqqarsaatigilluakkamik siunnersuuteqarnissaminut sukumiisumik piareersarnissani. Allannguutissatut siunnersuut partiip Upernaamut ataatsimiinnissaq sioqqullugu nassiutereersinnaagaluarpaa taamaasilluta tutsuviginartumik tunngavissaqarluta oqallissinnaassagaluaratta.
Ajoraluartumilli qularaara, partiip taama piareersarsimatiginissaa. Ajoraluartumik isumaqarpunga, Siumup aammaarluni nalilersimassagaa, nilliangaanni piviusunngortinneqarsinnaanngitsunillu piumasaqaraanni ajornannginnerpaasoq, sukumiisumik suliniuteqarnermut naleqqiullugu.
Neriuppunga, kukkullunga, Siumullu upernaamut ataatsimiinnissamut ataqatigiissumik tunngavilersorluakkamillu aatsitassarsiornermut inatsisip allannguutissaanik saqqummiussiumaartoq. Siumukkormiunulli erseqqissalaaginnassavara, taamaassappat ulapittariaqassasut, qaammatip aappaa avillugu qaangiuppata siunnersuutit assigisaallu inatsisartut allattoqarfianut tunniunneqareersimasussaammata.
Paasisaqarnerorusukkuit attavigisinnaavarma uunga sianerlutit 58 73 05.
Inussiarnersumik inuulluaqqusillunga
Anda Uldum
Demokraatit politikkikkut oqaaseqartartuat
