Naligiimmik pineqarnissaq pisariaqalerpoq Created by Hanne on 03-02-2012 15:55:42
 |
Allattoq Justus Hansen, Inatsisartunut Demokraatit sinnerlugit ilaasortaq
Imigassaq kimulluunniit peqqinnanngilaq. Imigassaq kimittooq sualummik. Akulikittumik persuttaatoqarsimatillugu imigassaq akuujuarpoq aamma pisuni suli ajornerusuni. Amerlanerpaarpaalli imersinnaapput puuarrallanngikkaluarlutik. Tamanna nuannerpoq, tamannalumi pissutaagunarpoq imigassartorsinnaaneq akuerisaammat. |
Imigassaq kimulluunniit peqqinnanngilaq. Imigassaq kimittooq sualummik. Akulikittumik persuttaatoqarsimatillugu imigassaq akuujuarpoq aamma pisuni suli ajornerusuni. Amerlanerpaarpaalli imersinnaapput puuarrallanngikkaluarlutik. Tamanna nuannerpoq, tamannalumi pissutaagunarpoq imigassartorsinnaaneq akuerisaammat.
Imaluunniit, pissutaagunarpoq IMIGASSAP SUMIIFFINNI AMERLANERNI imerneqarsinnaaneranut. Politikerimmi nuimanersaasa aalajangernikuuaat, Tunumi najugaqartugut naammattumik inersimanngitsugut, nammineerluta naliliinissatsinnut imigassamik kimittuunik imissanerluta. Aalajangerneqarnikuuvoq taamatut pisinnaatitaaffeqassanngitsugut.
Nalunngilara qaleriiaatiinnalerumaartut uannik oqaluttuussiniartut Tunumi inuuneq qanoq nuannersisimatigisoq imigassat kimittuut nioqqutigeqqusaajunnaarmatali. Aamma taakkorpiaat qaleriaatiinnarlutik oqaluttuunniarumaarpaannga persuttaannerit aamma qanoq ikilisimatigisut. Illuatungaanulli saatitsilaarlanga qaqqaqqalaartullu aperalugit, qanoq pisoqassanersoq, Nuummi imigassanik kimittuuneq nioqquteqaqqusiunnaartoqaraluarpat? Kialluunniit sapaatip akunneranut illoqarfiit pingaarnersaanni politiit nalunaarusiaannik atuartartup takussuaa, imigassaq pissutaalluni pisorpassuaqartartoq. Taakku qaavannut ilanngunneqassapput pisartorpassuit politiinut anngunneqarneq ajortut. Nuummi imigassanik kimittuuneq nioqquteqaqqusiunnaarneq allatut oqaatigalugu qularnanngitsumik kingunerissavaat persuttaannerit allallu ikileriarujussuarnerat. Taava imaassava Nuummi imigassaq kimittooq nioqqutigeqqusaajunnaarsinneqassasoq?
Uanga nammineq isumanga qularnaappoq; soorunami taamaattoqassanngilaq. Taamaalisoqanngisaannassaq, iluanngitsummi ikittuinnaat imigassartorneq nalunerisa amerlanerit iluamik imigassamik atuisinnaasut aserorteruttariaqanngilaat.
Maani Tunumi ilissinniit kitaamiunit allaanerunngilagut. Amerlanerpaartatta imigassaq nuannaarniutigalugu atortarpaat, ilissinnulli naleqqiulluta, imigassamik kimittuumik pisisinnaanngilagut, kitaani ajunngitsuliorusunganaraluartut politikerit nuimasut aalajangernikuummassuk, pisariaqartoq inunnik imikkoortitsinissaq apeqqutaatillugu sumut nuussimanerat.
Isumaqarpunga tamanna eqqortuliornerunngitsoq. Isumaqarpunga, nunami maani inuttaasut assigiimmik pineqarnissaat pisariaqartoq. Kalaallit akornatsinni amerlanerpaat imigassaq pitsaasumik atortarparput – sumiikkaluaruttaluunniit. Taamaattumik immikkoortitsineq naapertuutinngilaq.
Paarlattuanik isiginiarnerusariaqaraluarparput inuit imigassamik ajornartorsiutillit qanoq ikiorsinnaanerlugit aamma meeqqagut inuusuttagullu qanoq perorsarsinnaanerigut peqqinnartumik imeriaaseqalernissaannut aamma imigassamut pitsaasumik isiginneriaaseqalernissaannut.
