Malersuisartut Created by Hanne on 03-02-2012 14:36:05
 |
Inatsisartut Suleriaasianni § 37 naapertorlugu Naalakkersuisunut apeqqut imaattoq matumuuna saqqummiuppara:
1. Naalakkersuisut pilersaaruteqarnerlutik ”malersuisartut” pillugit inatsisiliornissaminnut pisortatigoortumik taaguuserlugu ”palleqqusaannginneq, uninngaqqusaannginneq aamma peersitaaneq pillugit inatsit” Kalaallit Nunaannut atuuttussamik aamma taamatut pilersaaruteqartoqarpat taava qaqugu siunnersuuteqartoqarnissaa pilersaarutigineqarpa?
(Inatsisartunut ilaasortaq Andreas Uldum, Demokraatit)
|
Tunngavilersuut:
Ulloq 17. januar 2012 Folketingimi ilaasortat isumaqatigiillutik palleqqusaannginneq, uninngaqqusaannginneq (nunap ilaani aalajangersimasumi uninngaqqusaannginneq) aamma peersitaasinnaaneq pillugit inatsisissatut ataatsitut nutaatut siunnersuut akueraat.
Inatsisiliornermi siunertaavoq inuit eqqissiviilliortinneqarnissaannut, malersorneqarnissaannut akorngusersorneqarnissaannullu illersornerulernissaat, tassunga ilanngullugu malersorneqartillutik. Inatsisinik atortitsinermut ministeri Morten Bødskob (Socialdemokraterne) inatsit akuerineqarmat imatut oqaaseqarpoq:
”malersorneqarneq inunnut ataasiakkanut tujorminartupilussuuvoq. Taamaattumik angorusoqaara arlaannik iliuuseqarluta akorngusersorneqartut malersorneqartullu illersornerunissaat. Minnerunngitsumik eqqarsaatigalugit inut aaqqissuussamik ataavartumillu malersorneqartartut akorngusersorneqartartullu (stalking). Taamaattumik nuannaarutigaara, ullumi Folketingip tamarmiusup tapersermagu, naleqquttunik ataqatigiissunillu malittarisassaqalernissarput, immikkoortumi pineqartumi sulinermik pitsanngortitsisussanik”.
Demokraatini Inatsisinik atortitsinermut ministeri isumaqatigilluinnarparput taamaattumik kissaatigaarput inatsisip maani nunami aamma atuutsinneqalernissaa. Tamannalu periarfissaqarluarpoq. Inatsisimmi § 26-ata imm. 2-ani imatut allassimavoq:
”Inatsit Kalaallit Nunaannut atuutinngilaq, § 22-ili 23-ilu pillugit immikkulli akuersisoqarneratigut kunngip akuersineratigut Kalaallit Nunaanni atortussanngortinneqarsinnaavoq allanngortillugu kalaallit nunaanni pissutsit pisariaqartitsinerat naapertorlugu.”
Taamaattumik atortussanngortinnissaa ajornartorsoorpasinngilaq. Demokraatini neriuutingaarput, Naalakkersuisut iliuuseqapallassinnaajumaartut, maani innuttaasut akorngusersorneqartut inatsisitigut illersorneqarnerat pitsanngortikkumallugu.
