Ikiuuttariaqarpugut piumasaqaannarata Created by Hanne on 03-02-2012 14:33:11
 |
Siunissami atungarissaartuunissatta qulakkeernissaa tamatta akisussaaffigaarput. Demokraatini isumaqarpugut allatut iliorsinnaanngitsugut; amerikami pissutsit atorusunngilagut, tassani kikkut tamarmik imminnut namminneq ikiortussaapput aammali kikkut tamarmik assigiilluinnarmik atungaqarnissaat kissaatiginngilarput, taamatut ingerlaaseqarnermi suut tamaasa kikkut tamarmik pigaat, taamaattumik ilungersornerunissaq akilersinnaanngilaq.
Allattoq Andreas Uldum, Demokraatit politikkikkut oqaaseqartartuat |
Atungarissaartuunerput ulorianartorsiorpoq. Pissutsit pissusiviusut takutippaat utoqqaat amerliartuinnartut – soorunami ikiorneqartussat kiisalu inuusuttut sulisinnaasut pilersuisussallu ikiligaluttuinnartut.
Atungartuussuseq qajannarpoq. Paarilluartariaqarparput. Aatsaallu taamaaliorsinnaavugut nammineq inuunerput maannanut naleqqiullugu akisussaaffiginerulerutsigu. Tamatta anguniartariaqarparput immitsinnut ataasiakkaarluta ikiornissarput. Anguniartariaqarparput Inuiaqatigiit atungartuut ikiorsiissutigisinnaasaat taamaallaat atortassagingut pisariaqartitsisilluta.
Eqqortuuvoq atungarissaarnitta ullutsinni naliginnarni toqqissisimatimmatigut. Nakorsiarsinnaavugut, ilinniarsinnaavugut, biilersinnaavugut asfaltimik qallersukkat aqquserngit atuarlugit, ingerlaannaq utoqqalinersiutisiaqalersinnaavugut, utaqqaligutta, aamma inunnik isumaginnittoqarfimmit suliffeqanngikkallarnitsinni ikiorneqartarpugut. Tamakku – allarpassuillu – iluaqutissarsivigisarpagut qaammatit tamaasa akissarsiatta ilarujussui tamanut atugassanngorttaratsigit akileraarutit akitsuutillu aqqutigalugit.
Taamaattumik Demokraatini kissaatingaarput, tamatta immitsinnut ataasiakkaarluta aperissasugut qanoq ikiuussinnaanersugut, qanoq ikiorneqarnissarput eqqarsaatigiinnarnagu. Pisussaaffittut isigisariaqarparput sapinngitsatsinnik amerlanerpaanik akissarsiaqarnissarput, annermik tamanut atugassanik tunniussisarumalluta. Paarlattuanik aamma inuiaqatigiit pisussaaffigissavaat sulerusuttut akissarsiaqarnerunissaannut kaammattuinissaq. Tamanna tunngavigalugu pingaaruteqarpoq, sapinngisamik akileraarutit minnerpaaffissaaniitiinnarnissaat. Pingaaruteqarpoq, inunnut ikiorsiissutit ima killeqartigissasut, pisortanit ikiorsiissutinik pisarnermut naleqqiullugu sulinissaq TAMATIGUT akilersinnaanerussalluni.
Tamatuma saniatigut aamma pisariaqarpoq oqallisigissallugu inuiaqatigiit atungartuut sunik isumagisassaqassanersut. Inuiaqatigiit atungartuut suliassarissavaat puisip amiinut tunisanut tapiissuteqartarnissaq ? Inuiaqatigiit atungartuut suliassarissavaat ICC-mut Great Greenlandimillu aningaasalersuinissaq ? Naapertuuppa, inuiaqatigiit atungartuut ilangiinnut ukiumut 50 millioner koruuninik aningaasaliisarmata ?
Demokraatini isumaqarpugut, pingaarnerusoq sulissutigissallugu inuiaqatigiinni atungartuuni isumagisassatta pitsaanerpaanissaasa qulakkeernissaat. Inuiaqatigiit isumagisariaqangaat tassaapput ilinniartitaaneq, peqqinneq aamma utoqqalinersiat. Kissaatingaarput tamatta aningaasaatitta tamanut iluaqusiinerusumik atorneqartarnissaat, inuiaqatigiit aningaasaataannik ikittuinnaat iluaqusersornagit. Allatut oqaatigalugu aningaasaatigut peqqinnissaqarfimmut atorusunneruagut puisip amiinut tapiissutitut atornagit. Inuiaqatigiit aningaasaataat amerlanerit meeqqat atuarfiannut atorusunneruagut ikinnerillu ICC-mut. Utoqqarnut aningaasaleerusunneruvugut palasinuunngitsoq.
Taamatulli oqareerluta, Demokraatini pingaartillugu oqaatigissavarput, tamatsinnut pingaarnerpaammat oqallinneq aqqutigalugu tamanut paasitissagipput, eqqarsarunnaassagatta inuiaqatigiit atungartuut qanoq ikiorsinnaaneraatigut, eqqarsaatiginerussagippullu tamatta ataasiakkaarluta inuiaqatigiinnut qanoq iluaqusiisinnaanerluta. Tamanna paaseqatigiiffigisinnaagutsigut, taava siunissami inuiaqatigiinni atungartuussuseq, nalunngisarput iluarisarpullu, qulakkeeriartulissavarput.
