Ukiortaami kissaat: oqallinnerni tamani piviusut tunngaviusarlik Created by Hanne on 10-01-2012 14:02:54
 |
Kuupik Kleist ukiortaami oqalugiarnermini oqarpoq, kissaatigalugu aalisarneq pillugu oqallinneq kusanaarnerusumik ingerlanneqartassasoq. Tamatumunnga Demokraatini ilassutigalugu oqarusuppugut, kissaatigingatsigu siunissami inuiaqatigiinni oqallittoqartillugu paasissutissat piviusut tunngavigineqartassasut. Ajoraluartumilli Aleqa Hammond aamma Siumut Naalakkersuisut politikkiat pillugu eqqunngitsumik oqaluttuarsinnarput. |
Siumup siulittaasua Aleqa Hammond Kuupik Kleistip oqaaseqaataa pillugu imatut oqarpoq:
”Sinerissami illoqarfiit annerit avataanni sanaartornerup unissimanera Naalakkersuisut sanaartornermut politikkiata kinguneraa”
Taamak oqarneq eqqunngilluinnaqqissaarpoq, taamaattumillu naqqinneqartariaqarluni. Demokraatini tupinnarluinnaqqissaartutut isigaarput, salluliuutit tamakku naqqinneraqaratik nipangiutiinnarneqartarneri.
Piviusormi tassaavoq, sinerissami sanaartorneq unitsinneqanngisaannarmat. Oqaatigilara naalakkersuisoqatigiit pilermatali Tasiilami illuliortiterneq ingerlanneqarnikuummat. Nanortalimmi, Aasianni, Ilulissani, Sisimiuni aamma Qaqortumi sanaartornissaq aamma pilersaarutaavoq. Nanortalimmi, Qaqortumi nunaqarfinnilu arlalinnik atuarfiit iluarsaanneqarput. Taakku saniatigut aamma Naalakkersuisut kommuuninut marlunnut milliuunit untritilikkaat arlallit tunniunnikuuaat, Ilulissani Sisimiunilu atuarfiit iluarsaanneqarniassammata.
Illoqarfinni arlalinnik kollegialiortoqarpoq, aamma utoqqaat illui meeqqeriviillu sanaartorneqarput.
Taakku saniatigut aamma assersuutissarpaalussuarnik taasaqarsinnaavunga, isumaqarpungali neriullungalu assersuusiakka paatsoorneqarsinnaanavianngitsut.
Kusanartumik oqalliseriaaseqassagutta, pisariaqarpoq, Siumut aamma Aleqa Hammond oqalliseqataasalissasut paasissutissanik eqqortunik tunngaveqarlutik. Tamanna uanga Demokraatillu ukiortaami kissaatingaarput.
Inussiarnersumik inuulluaqqusillunga
Anda Uldum
Demokraatit Inatsisartuni gruppiat sinnerlugu politikkikkut oqaaseqartartoq.
Paasisaqarnerorusukkuit attavigisinnaavarma uunga sianerlutit 58 73 05.
