Ineriartorneq, tungiuineq, ilinniartitaaneq aamma kinaassuseq Created by Hanne on 02-01-2012 15:29:24
 |
Demokraatit siulittaasuata Jens B. Frederiksenip ukiortaami oqalugiaataa |
2012 Kalaallit Nunaannut ukiuussaaq pitsaasoq. Taamaalisinnaavoq. Inuiaqatigiit aalajangiinissanut angisuunut piareersarnikkuagut, 2012-mi pinngitsoorani piviusunngortittariaqartunut, qulakkeerumallugu Kalaallit Nunaat siunissamut, meerartatta nangikkumaagassaat.
Aatsitassarsiornerit nutaat, aluminiumik aatsitsivik aamma attaveqarnermut tunngasut aalajangiiffigisussaapput. Tamarmik suliffinnik nutaanik pilersitsissapput, sapinngisamik ilaqutariit amerlanerpaat isertitaannik qularnaarisussat.
Aalajangingassat angipput amerlasuunullu kinguneqassallutik. Allatut ajornaqaaq taamaattariaqarpoq, aalajangiinerit ineriartornissaq qulakkeertussaammassuk aamma tungiuineq ulluni naliginnarni aqqusaartagarput. Tungiuinerup pisama ilarujussua ilinniarneruvoq aamma ilinniartitaaneq aqqutigalugu qulakkiissavarput, inuiaqatigiittut suliassanik angisuunik pissanganartunillu nammineq suliaqarsinnaalernissarput.
Ingerlanerup tamatuma inuiaqatigiittut kinaassuseqartilissavaatigut, sulinitsigut ilaatigut iluatsissinnaarpasinngitsumik naggataatigut angussagatsigu ajungaasimaarneq. Ajungaasimaartariaqarpugummi. Namminersorluni Oqartussaanerup 2009-mi eqqunneqartup anguniagassartai aallartilluarpagut. Aningaasarsiornikkut ajornartorsiorneq sakkortunerpaaq, init suliffeqarfiillu oquttut, suut atorfissaqartitatta tamarmik akittoriartornerat aammalu allarpassuit akiorpagut.
Namminersorneq pillugu Inatsit taasissutigineqarmat innuttaasut amerlanerussuteqarluartut angerput. Kingorna inatsisissaq Inatsisartuni akuersissutigineqarpoq partiinit tamamit, aamma uangut akuerseqataavugut. Nunatsinni anersaajuvoq, sapinngitsugut nammineerusuttugullu. Anersaaq tamanna piviusunngortinneqassaaq. Tamatta akisussaaqataasariaqarpugut nunatsinnut. Pitsaasunut aammali aalajangernissanut artornartunut. Assersuutigalugu tamatta kissaatingaangut init pitsaasut ullutsinnullu naleqquttut. Aningaasalersuinissarli tikinneqaraangat allaaneq ajorpoq suut tamarmik ajunngitsut uangut ataasiakkaarluta taamaallaat eqqorneqanngikkutta. Tamattali ataasiakkaarluta akissussaassuseqarnerusariaqarpugut.
Taamaattuaannarpoq, piffinni ajornartorsiorfiusuni aalajangiingaanni, isornartorsiuisoqartuassaaq. Isornartorsiorneqarpugullumi. Isornartorsiuisunulli tusarnaarpugut, soorlu aamma tusarnaartarigut siunnersuuterpassuit pitsaasut innnuttaasunit eqiigasunit tunniusserusuttuniillu takkuttut. Taamatut ingerlavugut 2009-mi, 2010-mi aamma 2011-mi. Ukiumi tulliuttumi aamma pingaarutilinnik aalajangiisartussaavugut qularnanngitsumik inuiaqatigiinni ineriartornermut iluaqusiisussanik taamaattummillu aamma pinngitsoorata isornartorsiorneqartussaavugut.
Demokraatit eqiigallutik Naalakkersuisuni suleqataanerminni isornartorsiuineq akerusuppaat paasissutissiinertalimmik ammasumillu oqaloqatigiinnertalimmik. Isornartorsiuisoqarnerusarpoq naammattumik paasissutissiisoqarsimanngikkaangat taamaasillunilu paatsuuisoqarnerusarpoq. Kalaallit Nunaanni siunissami arlariit isumaqatigiissuteqartarnerat tunngaviussappat imaluunniit inuiaqatigiinni amerlanerpaat tapersersuilissappata, paaseqatigiilluarsinnaaneq tunngaviusariaqarpoq. Taamaattumik aamma Demokraatit 2012-mi Namminersorlutik Oqartussat ingerlataat, Naalakkersuisut sulinerat piffissaagallartillugulu iluarsartuussinerit pingaaruteqarnerat paasititsiniutiguarniarpaat.
2012-mi ukiut qulit ingerlasimassapput, Demokraatit pilersinneqarneranniit. Aallaqqaammut arlaannaataluunniit suleqatigiumanngilaatigut – taakkusimavugut piviusunik tunngavillit piviusullu pillugit toqqaannartumik apuussisartut, taamaattumik oqartussaaqataanissarput ornigineqarsimanngilaq. Kisianni taamaakkunnaarpoq. Demokraatit kalaallit nunaanni politikkip qeqqani qajannaatsumik inissinnikuupput, tassani socialliberalisme tunngavigalugu sapinngisarput naapertorlugu aamma inuiaqatigiit tunniussaat ilaasortaqassuserput tunngavigalugu politikkerput piviusunngortittarparput. Ukiuni pingasunngulersuni kalaallit nunaata oqaluttuarisaanerani naalakkersuisoqatigiit nukittunersaanni Demokraatit suelqataapput. Tamanna perrualaarutigerusuppara. Assut tulluusimaarutingaara. Tamannarpiarlumi tunngavigalugu oqarsinnaavunga Demokraatit naleqassusertik takutissimangaat aammalu partiip pisariaqartinneqarnera.
Kisianni soorunami imaanngilaq, ingilluartitaaginnassasugut. Taamaattoqanngilluinnarpoq. Sulissutigiuassavarput qanoq iliorluta inuiaqatigiit pitsaanerpaat pilersissinnaanerlutigit. Isuamqarpugut Kalaallit Nunaata siunissami tunngavigisariaqaraa ineriartorneq, tungiuineq, ilinniartitaaneq kinaassuserlu kiisalu naleqartitagut taakku ataqatigiilluinnartut.
Allatut oqaatigalugu ilinniarluarsimasunik nakimaatsunillu innuttaqassaagut, immikkuullarissumik kultureqarnitsinnut kinaassuseqarnitsinnullu ataqqinnittut aamma ineriartortitsiuarsinnaasut taamaasillutillu qulakkeerlugit inuiaqatigiit atungarissaartut.
Taamaasiornitsigut pilersinniarparput inuiaqatigiit ingerlalluartut patajaatsumik toqqammaveqarnissaat, tamatta perruualaarutigisinnaasatsinnik.
2012 ukioq allanngorfiussaaq. Malugalugu pitsaasumik allanngorfiussaaq. Qulequtarpassuit oqallisigineqassapput tamatumunngalu Demokraatini qilanaarpugut, oqallinnerup apuuttussaammagu, taamaallaat pitsanngorsaasinnaasugut allanngortitsinerit aqqutigalugit.
Isumalioqatigiisitat angisuut marluk – angallannermut aamma Akileraarnermut Tungiuinermullu Isumalioqatigiisitat – arlalinnik innersuussuteqarput, maannamut aamma oqallinnermi tunngaviulluarsimasunik. Maannakkullu piffissanngorpoq uangut politikerit sassarnissarput, aalajangiillutalu. Tamanna pissaaq 2012-p ingerlanerani. Oqareernittut Demokraatini piareersimavugut akisussaaqataanissatsinnut neriuppugullu, partiit allat illuatungiliuttut ilanngullugit sutigut tamatigut pitsaasunik atasinnaasunillu aaqqiissuteqartarnissamut peqataajumaartut. Inuiaqatigiit tamanna pisariaqartippaat.
Tamassi ukiortaami pilluarnartumik kissaallusi pilluaritsi.
