Siunissamut timmisartoriarta Created by Hanne on 02-01-2012 15:25:14
 |
Oqallissaarut
Allattoq Justus Hansen, Demokraatit angallannermut oqaaseqartartuat |
Angallanneq pillugu oqallinnerit ukiukkut anorersuartut sakkortutigisumik ingerlapput. Tamanna Demokraatini nuannaarutingaarput, isumaqaratta, oqallinneq pisariaqartoq. Kisianni pitsaanngilaq, oqallinneq naassaanngitsumik ingerlanneqassappat – pingaarnerpaajuvorli aalajangiinissaq.
Qaqutigoorluinnarpoq, aalajangiunneqartut tamanit iluarineqartarneri, aamma matumani taama pisoqarnavianngilaq. Innuttaaqatitta ilaasa aalajangiineq nuanniilliutigiumaarpaat, ilaat pakatsiumaarput allallu puuarrallakkumaarput. Soorunami nuanninngilaq, kisianni tassa taamaappoq.
Inatsisartuni sivisuumik pikkunartumillu Angallanneq pillugu Isumalioqatigiisitat isumaliutissiissutaat ukiakkut ataatsimiinnermi naammasseqammersumi sakkortuumik oqallisigaarput. Oqallinnerup uppernarsarpaa angallannermut apeqqutip oqallissigineqarnera kissaammertitsisartoq.
Demokraatini erseqqissarusupparput, siunissami angallanneq silaannakkut piumaarmat. Silarsuaq – taamaasillunilu Kalaallit Nunaat – ulapinnerulernikuuvoq, tamannalu tunngavigalugu piffissaajaataasariaqanngilaq angallannerup imaatigut pinissaa. Aallarfimmiik a-miit tikiffimmut b-mut sukkasuumik angalasariaqarpugut. Taamaattumik pingaartupilussuuvoq, silaannakkut angallannerup aaqqissuunnissaa sapinngisamik amerlanerpaat iluarisaannik kiisalu aningaasaliissutitta sapinngisamik angalanerunermik kinguneqarnissaa.
Tamanna tunngavigalugu tupinnanngilaq, angallanneq pillugu isumalioqatigiisitat innersuussutigimmassuk, timmisartorsuit atlantiku qulaallugu timmisartut Nuummi mittarfittaartariaqartut. Innersuussutigineqartoq Demokraatini tamakkiisumik taperserparput. Tassami angalasut amerlanerpaartaat Nuummiit aallartarput Nuummullu tikittarlutik. Tamanna tunngavigalugu inuppassuit pisariusumik akunnikkallartarunnaassagaluarput inuiaqatigiillu siunissaq qaninnerusoq isigalugu aningaasanik sipaarlutik. Demokraatini maannakkut oqalliseqataaffigerusunngilarput, atlantiku qulaallugu timmisartorsuit mittarfissaat Nuummi sumi inissinneqassanersoq. Aalajangiisoqarumaarpoq misissueqqissaartoqareerpat.
Aamma isumaqarpugut, Qaqortumi suluusalinnut mittarfiliortoqarnissaanut isumalioqatigiisitat innersuussutaat malinneqartariaqartoq. Isuma uagut partiitut ukiorpassuarni siuttuuffiginikuuarput, taamaattumik tamanna tunngavigalugu nuannaarutigaarput paasillugu, pineqartoq aaqqiissutissaq inuiaqatigiinnut akikinnerpaasussaasoq. Tamatuma saniatigut aamma qissimissavarput, Kalaallit Nunaata kujataani angallannermi angalasut amerlanerpaartaat Qaqortuminngaanneertarmata imaluunniit Qaqortumut tikittarlutik.
Aalajangingassat taakku marluk soorunami sinerissami sumiiffinnut allanut sunniuteqartussaapput. Imaassinnaavoq atlantiku qulaallugu timmisartunut mittarfik Kangerlussuarmiittoq Narsarsuarmiittorlu matusariaqassasut imaluunniit annikinnerusumik atorneqalissasut. Soorunami aamma inuit sumiiffinni pineqartuni najugaqartut sulisullu attorneqartussapput aamma paasilluarsinnaavara kipiluttunassaqisoq. Tamatumunngali atatillugu tikkuarlara, Kangerlussuaq Narsarsuarluunniit aqagu matuneqarnavianngimmata. Ukiorpaaluit ingerlareerpata aatsaat Nuummi Qaqortumilu atlantiku qulaallugu timmisartunut mittarfiliortoqarsinnaalersussaavoq. Taamaattumik ullumikkut inuit Kangerlussuarmi Narsarsuarmilu najugaqartut sulisullu piffissaqarluarlutik paasiniarumarpaat atlantiku qulaallugu timmisartunut mittarfiit matuppata sumut nuussanerlutik sumilu sulilissanerlutik.
